Shkup, 15 prill – Ministri bullgar i Punëve të Jashtme, Georg Georgiev deklaroi se përfshirja e bullgarëve në Kushtetutë është kushti i parë, por jo i vetmi për fillimin e negociatave për anëtarësimin e vendit në BE dhe se ky nuk është bilateralizëm, por zbatim i konsensusit evropian.
“Është shumë e rëndësishme të dihet se ndryshimi i Kushtetutës dhe përfshirja e bullgarëve si popull shtetformues nuk është kushti i vetëm. Përkatësisht, nuk është mirë të anashkalohet në gjithë atë bisedë, me qëllimin eventual – që shpresoj të mos jetë kështu, nëse bëhet përfshirja dhe plotësohet kushti për ndryshime kushtetuese sipas konsensusit evropian, dikush të thotë: “ju thamë se bullgarët nuk kanë kusht vetëm një gjë”, tha Georgiev në emisionin “Bruksel 1”.
Ai vlerësoi se përveç ndryshimeve kushtetuese, konsensus evropian ka edhe zbatimi i Marrëveshjes për fqinjësi të mirë në Bullgari dhe protokollet që dalin prej saj, si dhe plani i veprimit për mbrojtjen e të drejtave të pakicave.
“Të gjitha këto duhet të jenë fakt, përndryshe nuk do të ketë përmbushje të konsensusit evropian, nuk do të ketë përmbushje të konkluzioneve të Këshillit, ndërsa përderisa kjo nuk është fakt, nuk do të mund të vazhdohet me hapjen e Klasterit të parë, ku janë të drejtat e njeriut”, tha Georgiev.
Shefi i diplomacisë bullgare vlerësoi se ndryshimet kushtetuese vetëm se do t’i hapin rrugë integrimit evropian, kurse këtu duhet të plotësohen kushtet e tjera të vendosura nga BE-ja, duke shtuar se kjo nuk është çështje bilaterale apo çështje e hapur ndërshtetërore.
Georgiev theksoi gjithashtu se nuk e kupton pse politikanët e Maqedonisë heshtin para qytetarëve të tyre dhe i paraqesin ndryshimet kushtetuese si kërkesë të vetme dhe jo të parë në proces.
“Prandaj u them vazhdimisht kolegëve të mi me qëllim të mirë, vërtet nuk dua të lë të mendohet se kjo po bëhet me tendencë dhe me ndonjë qëllim të fshehtë. Përkundrazi, janë të shkruara shumë qartë kushtet bardh e zi nëpër të cilat lëviz procesi”, deklaroi Georgiev.
Ministri bullgar shtoi se qëndrimi i Sofjes është i qartë dhe se ajo nuk do të ndryshojë qëndrimin e saj dhe nuk ka asgjë që do të përgënjeshtrojë konsensusin evropian të arritur në vitin 2022 për integrimin e Ballkanit Perëndimor në BE, pas të cilit, siç thotë ai, e gjithë BE-ja qëndron.
Dje përfaqësuesja e Lartë e BE-së për Politikë të Jashtme dhe Siguri, Kaja Kallas, theksoi se nëse shikohet në hartë, Ballkani Perëndimor është gjeografikisht në Evropë dhe për këtë arsye vendet e atij rajoni duhet të jenë në Bashkimin Evropian, gjë që e bën procesin e zgjerimit shumë të rëndësishëm dhe duhet të vazhdojmë me të.
Në konferencën për shtyp pas përfundimit të Këshillit të Punëve të Jashtme të BE-së në Luksemburg, ku mbrëmë u mbajt edhe një darkë jozyrtare e krerëve të diplomacisë së vendeve anëtare të BE-së dhe vendeve të Ballkanit Perëndimor kushtuar sigurisë dhe mbrojtjes, në të cilën mori pjesë edhe Ministri i Punëve të Jashtme dhe Tregtisë së Jashtme, Timço Mucunski, Kallas theksoi se është e qartë se stabiliteti dhe siguria e rajonit është e një rëndësie thelbësore, kurse mënyra më e mirë për të ulur tensionet është që të gjitha vendet nga Ballkani Perëndimor të anëtarësohen në BE.
“Atëherë do të ketë më pak tension, sepse Bashkimi Evropian është një projekt paqësor dhe punon për të qetësuar tensionet mes atyre vendeve”, tha Kallas, duke shtuar se mesazhet janë shumë të qarta, sepse anketat tregojnë se mbështetja për BE-në në vendet e rajonit është përgjithësisht shumë e lartë.
Të dielën ministri i Punëve të Jashtme dhe Tregtisë së Jashtme, Timço Mucunski në Luksemburg realizoi takim me komisioneren evropiane për zgjerim, Marta Kos, në të cilin diskutuan për statusin aktual të dosjes Maqedoni-BE, përkushtimin e ndërsjellë për tejkalimin e sfidave aktuale dhe domosdoshmërinë e përshpejtimit të procesit të integrimit evropian.
“Bashkërisht u konfirmua përkushtimi i Qeverisë për agjendën e reformave dhe përputhshmëria e plotë me Politikën e përbashkët të jashtme dhe të sigurisë të Unionit, që është një konfirmim i fortë i orientimit strategjik të vendit dhe hap një rrugë të besueshme drejt anëtarësimit të plotë në BE, kumtoi Ministria e Punëve të Jashtme dhe Tregtisë së Jashtme.
