Shkup, 14 shkurt – Gjithsej 28 raste të pertusis, kolla e mirë, janë evidentuar në territorin e Shkupit deri në mëngjes, konfirmoi për MIA-n, mjekja Lulzime Bajrami nga Qendra për Shëndet Publik.
Komisioni për Sëmundje Infektive, mes tjerash, solli rekomandim për shpallje të epidemisë të kollës së mirë në Shkup.
Autoritetet shëndetësore aktualisht po bëjnë apel tek qytetarët që të vaksinojnë veten dhe më të vegjlit, në mënyrë që të mbrohen nga pertusis. Siç theksojnë ata, vaksina që merret në 2, 4, 6, 18 muaj dhe në 7 vjeç është vendimtare për të parandaluar përhapjen e mëtejshme të sëmundjes.
UNICEF ka shprehur shqetësimin për numrin në rritje të rasteve të kollës së mirë në vend dhe lajmet për rastet e fruthit në rajon dhe i është bashkuar thirrjes së ekspertëve shëndetësorë për prindërit dhe kujdestarët që të vaksinojnë fëmijët që nuk i kanë marrë vaksinat.
Zëvendësministrja e Shëndetësisë në Qeverinë Teknike, Maja Manoleva, të hënën duke iu përgjigjur pyetjeve të gazetarëve tha se pikat në qendrat shëndetësore punojnë me orar të zgjatur.
“Në veçanti, në Shtëpinë Shëndetësore Shkup janë hapur turne shtesë në disa poliklinika në të gjithë qytetin, ndërsa pikat e vaksinimit do të punojnë edhe të shtunave. Është e vërtetë që ka një rrëmujë. Për këto arsye u bëj thirrje prindërve që të vaksinojnë fëmijët e tyre në terminin e rregullt të vaksinimit, në mënyrë që të mos përballemi me një valë tjetër si kjo në të ardhmen dhe për fruthin dhe sëmundjet e tjera për të cilat fëmijët duhet të vaksinohen në kalendarin e rregullt. Por këtu kemi mundësuar kushtet që pikat e imunizimit të punojnë me orar të zgjatur edhe në këtë periudhë”, tha Manoleva.
Manoleva iu përgjigj edhe pyetjes së një gazetari, nëse Ministria ka paraqitur kërkesë në Prokurori për personat që ndajnë antivaksinimin në rrjetet sociale, me ofendime ndaj mjekëve, ku vërtet thuhen disa teza kundër vaksinave të dëmshme në fushën e imunizimit dhe prindërit i besojnë.
“Për momentin kemi njerëz që nuk janë mjekë, të cilët realisht kanë një ndikim të madh sipas komenteve dhe ndjekësve të tyre që nuk do të vaksinojnë fëmijët e tyre. Rënia e imunizimit në vitet e fundit, do të thosha dy dekada, është ndoshta rezultat i ndikimit të mediave, por edhe i rritjes së numrit të njerëzve që promovojnë antivaksinim, i cili nuk bazohet në mjekësi të bazuar në prova. Gjegjësisht, situata si kjo me pertusis, si vitin e kaluar me fruthin, ndoshta sërish këtë vit me fruthin, nëse nuk vazhdojmë të rrisim shkallën e imunizimit, do të sjellim vërtet pasoja të rënda për shëndetin e qytetarëve tanë dhe mendoj se pikërisht ky duhet të jetë rasti që të gjithë ne të shohim se ku do të shkojmë, duke dëgjuar ato akuza që na bëjnë grupet antivaksere”, sqaroi ajo.
Lidhur me gripin sezonal, informoi se deri tani janë vasinuar mbi 60 mijë njerëz.
“Kemi ende pacientë që paraqiten me pasqyrë më të rëndë klinike të gripit sezonal, para së gjithash në spitale, këta janë ende pacientë që kanë shumë komorbiditete, sëmundje shtesë në të cilat infektimi me grip sezonal e komplikon edhe më shumë të gjithë situatën”, sqaroi Manoleva.
Në vend ka fëmijë dhe të rritur të hospitalizuar me pertusis. Mirëpo, ditët e fundit autoritetet kanë deklaruar se situata në vendin tonë është stabile dhe ndryshe nga vendet e rajonit, fatmirësisht nuk kemi raste të vdekjes.
