Premiera zyrtare e telefonit Honor Magic V5 është njoftuar për 2 korrik, dhe informacionet dhe pamjet e modelit të ri premium me palosje tashmë po shfaqen në internet.
Pasi Digital Chat Station ndau së fundmi fotot e para të pajisjes, tani kanali në YouTube Techtacle ka publikuar një video hapjeje që zbulon dizajnin, dimensionet dhe aksesorët që vijnë në paketim.
Paketimi i telefonit përfshin një karikues 66W, një kabllo USB A-to-C dhe një mbulesë mbrojtëse, transmeton Telegrafi.
Është interesante se mbulesa mbulon pjesën e pasme të pajisjes dhe menteshën, ndërsa ekrani i përparmë (i jashtëm) lihet i pambrojtur.
Përveç kësaj, unaza rreth kamerës mund të tërhiqet dhe të përdoret si mbështetëse, gjë që është e përshtatshme për shikimin e përmbajtjes pa e mbajtur telefonin.
Sa i përket dimensioneve, Magic V5 zyrtarisht ka një trashësi prej 8.8 mm kur paloset dhe vetëm 4.1 mm kur shpaloset, gjë që e bën jashtëzakonisht të hollë për një telefon me palosje.
Pesha zyrtare është 217 gramë, por videoja mati 224 g – ndoshta për shkak të mbrojtësit të ekranit të instaluar në fabrikë. Duke shtuar një mbulesë, pesha totale arrin në 253 gramë.
Dizajni i pajisjes është mbresëlënës – modeli në video vjen në një kombinim të të kuqes, arit dhe të zezës. Pjesa e pasme është e mbuluar me lëkurë ekologjike të kuqe, ndërsa skaji rreth kamerës dhe mentesha janë në ngjyrë ari me një teksturë tredimensionale.
Mekanizmi i menteshës lejon që telefoni të mbahet në një pozicion gjysmë të hapur (në 70° dhe 90°), gjë që është e dobishme për kryerjen e shumë detyrave njëkohësisht ose thirrjet video.
Kur bëhet fjalë për specifikimet e harduerit, Magic V5 pritet të përdorë çipsetin më të fundit Snapdragon 8 Elite Leading Version, si dhe një bateri 6,100 mAh.
Sistemi i kamerave përfshin tre sensorë prej 50 MP secili, megjithëse disa burime pohojnë se kamera telefoto përdor një sensor 64 MP.
Ekrani i jashtëm është i lakuar dhe mat 6.45 inç diagonalisht, ndërsa ai i brendshëm është tetë inç. Ekziston gjithashtu mbrojtja e pritur IP68/IP69 nga uji dhe pluhuri.
Konfirmimi zyrtar i të gjitha specifikimeve do të vijë më 2 korrik, kur Honor do të prezantojë zyrtarisht modelin Magic V5.
