Tetovë, 2 dhjetor – Nesër do të dihet se çfarë masa do të ndërmerren për SHF “ Marsi” në Çellopek të Tetovës, ku nga Inspektorati Shtetëror i Arsimit sot bënë mbikëqyrje të jashtëzakonshme, duke kërkuar përgjegjësi për organizimin e manifestimit shkollor në të cilin morën pjesë nxënës të veshur me uniforma ushtarake me emblema të UÇK-së dhe me pushkë në dorë.
Kjo ngjarje ka ndodhur më 28 nëntor kur shqiptarët e shënuan Ditën e Flamurit, ndërsa Inspektorati sot kreu mbikëqyrje të jashtëzakonshme në shkollën fillore “7 Marsi”.
“Ende nuk është përpiluar procesverbali, besoj se më së voni deri nesër do të jetë gati dhe do të veprohet sipas ligjit. Do të ketë masa, por presim të përfundojë mbikëqyrja”, deklaroi për MIA-n drejtori i Inspektoratit, Shaban Allajbegu.
Edhe Komuna e Bërvenicës ka kërkuar përgjigje nga shkolla pas ngjarjes.
“Ne morëm deklaratë nga drejtori për ngjarjen. Më tutje do ta respektojmë vendimin e Inspektoratit”, deklaroi kryetari Jovica Ilievski.
Për ngjarjen dje reagoi edhe ministrja e Arsimit dhe Shkencës, Vesna Janevska e cila në Fejsbuk shkroi se është “thellë e dëshpëruar dhe e shqetësuar” nga vendimi i udhëheqësisë dhe mësimdhënësve në SHF “7 Marsi” në Çellopek që ta organizojnë manifestimin, por edhe nga miratimi i prindërve të nxënësve “të cilët e duartrokitën gjithë këtë”.
Ministrja sot, gjatë vizitës në Shtip, për mediat deklaroi se përveç se për SHF “7 Marsi” në Çellopek, MASH ka dëshmi dhe fotografi me denoncime për ngjarje të tilla edhe në dy shkolla në Tetovë dhe në shkolla në Çair dhe Strugë, dhe se inspektime do të ketë edhe për ato raste.
