Teheran, 3 prill, argument.mk/ –Irani deklaroi sot se ka rrëzuar një avion luftarak ”F-35”, sipas një njoftimi të publikuar nga Garda Revolucionare Islamike (IRGC), një nga forcat më elitare ushtarake të vendit.
Sipas deklaratës, ”avioni është goditur mbi hapësirën ajrore iraniane nga një sistem i ri dhe i avancuar i mbrojtjes ajrore”.
IRGC pretendon se ky është ”avioni i dytë ‘F-35’ i rrëzuar” gjatë përshkallëzimit të fundit të konfliktit.
Nga ana tjetër, nuk ka pasur konfirmim të menjëhershëm nga Shtetet e Bashkuara të Amerikës, të cilat janë të përfshira në luftë kundër Iranit së bashku me Izraelin që prej 28 shkurtit.
Në deklaratë thuhet se avioni është shkatërruar plotësisht dhe nuk ka informacion mbi fatin e pilotit, ndërsa shtohet se mbijetesa e tij është pak e mundshme.
Megjithatë, Komanda Qendrore e SHBA-së (CENTCOM) ka hedhur poshtë më herët raportimet iraniane për rrëzimin e avionëve amerikanë, duke i cilësuar ato si të pavërteta.
CENTCOM mohoi dje pretendimet se një avion i tij ishte rrëzuar mbi ishullin iranian në jug të vendit.
Avioni ”F-35”, i prodhuar nga kompania amerikane ”Lockheed Martin”, konsiderohet një nga avionët luftarakë më të avancuar në botë dhe deri më tani nuk ka pasur raste të konfirmuara të rrëzimit të tij në konflikt të armatosur.
