Izraeli ka planifikuar të mbajë “kontrollin e sigurisë” në Rripin e Gazës edhe pas armëpushimit, tha sot ministri i Mbrojtjes, Israel Katz.
“Kjo do të thotë se, pas shkatërrimit të pajisjeve ushtarake dhe administrative të organizatës militante palestineze Hamas, ushtria izraelite do të ruajë lirinë e plotë të veprimit – e ngjashme me situatën në Bregun Perëndimor”, tha Katz në platformën e medias sociale X.
Në Bregun Perëndimor, trupat izraelite kryejnë rregullisht bastisje në qytete teknikisht nën kontrollin e sigurisë së Autoritetit Palestinez.
“Ne nuk do të tolerojmë asnjë organizim terrori kundër komuniteteve izraelite dhe qytetarëve izraelitë nga Rripi i Gazës”, tha Katz.
“Ne nuk do të lejojmë një kthim në realitetin e para 7 tetorit”, shtoi ai.
Masakra e kryer në Izrael nga Hamasi dhe grupet e tjera militante nga zona bregdetare më 7 tetor të vitit të kaluar rezultoi në 1200 të vdekur dhe më shumë se 250 persona të rrëmbyer, duke shkaktuar luftën në Gazë.
Që atëherë, Izraeli ka luftuar Hamasin në Gazë, ku, sipas burimeve palestineze, deri më tani janë vrarë më shumë se 45 000 njerëz.
Hamasi kërkon tërheqjen e plotë të ushtrisë izraelite nga Rripi i Gazës dhe fundin e luftës si kushte për një armëpushim.
Megjithatë, Izraeli synon me çdo kusht të parandalojë një ringjallje të organizatës islamike pas luftës.
