Shkup, 23 janar – Në seancën qeveritare që duhet të mbahet javën e ardhshme, pritet të përfundojnë të gjitha procedurat rreth linjës kreditore nga huaja hungareze, e dedikuar për kompanitë.
Zëdhënësja e Qeverisë, Marija Miteva, sot në konferencë për shtyp në Qeveri tha se sipas paralajmërimeve të Qeverisë, kjo linjë kreditore duhet të bëhet operative deri në fund të janarit.
“Si Qeveri, paralajmëruam se deri nga fundi i janarit pritet që linja kreditore nga borxhi hungarez, e dedikuar për kompanitë, të bëhet operative. Kjo është javën e ardhshme dhe pres që në atë seancë të Qeverisë të përfundojnë të gjitha këto procedura që kompanitë të mund t’i shfrytëzojnë këto mjete financiare”, tha Miteva në pyetjen gazetarëve.
Linja e kredisë për kompanitë është pjesë e borxhit hungarez prej gjysmë miliardë euro, për të cilin Qeveria më 8 tetor në Budapest nënshkroi marrëveshjen me Bankën hungareze Eksport-Import. Gjysma e mjeteve janë të destinuara për kompanitë, ndërsa gjysma për komunat.
Lidhur me atë se kur Qeveria do t’i publikojë emrat e këshilltarëve qeveritarë dhe sa janë pagat e tyre, Miteva u përgjigj se kjo do të ndodh pasi të përfundojë plotësisht procesi i ekipimit.
