Derby d’Italia mund të sjellë një kthesë të bujshme në afatin kalimtar të transferimeve, pasi Juventusi ka shfaqur interesim për Hakan Calhanoglun. Mesfushori turk aktualisht është në një situatë të paqartë sa i përket rinovimit të kontratës me Interin, ndërsa “Bianconerët” po e monitorojnë nga afër situatën dhe mund të tentojnë transferimin e tij nëse palët nuk arrijnë marrëveshje.
Sipas Ekrem Konur, Juventusi po e ndjek me vëmendje zhvillimin e situatës rreth të ardhmes së Calhanoglut te Interi.
Mesfushori 32-vjeçar ka kontratë me klubin nga “San Siro” deri në qershor të vitit 2027, por diskutimet për një zgjatje të saj raportohet se kanë ngecur, duke lënë të hapur mundësinë që klubet e interesuara të ndërhyjnë.
Përveç interesimit nga klubet e Superligës turke, një transferim brenda Serie A do të përbënte një lëvizje të rëndësishme në futbollin italian. Juventusi po vlerëson opsionet për përforcimin e skuadrës në planin afatgjatë dhe mundësia për të marrë një lojtar kreativ me përvojë nga një rival direkt raportohet se po shqyrtohet nga drejtuesit.
Interesimi i Juventusit lidhet edhe me nevojat taktike të skuadrës së Luciano Spallettit. Trajneri i “Bianconerëve” ka përdorur shpesh një dyshe në mesfushë të përbërë nga Douglas Luiz dhe Pape Matar Sarr, por asnjëri nuk konsiderohet specialist i rolit të organizatorit të lojës nga thellësia, i njohur si “regista”.
Calhanoglu do t’i mbushë 33 vjeç në shkurt, ndërsa gjendja e tij fizike është bërë një shqetësim për Interin.
Mesfushori turk aktualisht është jashtë fushave për shkak të dëmtimit të shtatë që ka pësuar që nga nëntori i vitit 2025, ndërsa shpreson të rikthehet te skuadra e Cristian Chivut pas përfundimit të pushimit ndërkombëtar.
