Shkup, 1 shkurt – Këshilli Gjyqësor i Republikës së Maqedonisë së Veriut njoftoi se me kujdes i ndjek reagimet në opinion, në lidhje me vendimin e Gjykatës Supreme, që ka të bëjë me Lidhjen e Sindikatave të Maqedonisë dhe në kuadër të kompetencave të tij ndërmerr veprime në drejtim të konstatimit të gjendjes.
Deri te Këshilli është dorëzuar parashtresë nga Lidhja e Sindikatave të Maqedonisë, e njejta menjëherë i është caktuar një anëtari të Këshillit dhe në vijim është procedura rreth parashtresës.
Gjykata Supreme më 09.11.2023, ka marrë aktvendim për lëndën REV 1-77/22, në të cilin paditës është Republika e Maqedonisë së Veriut kundër të paditurit, Lidhja e Sindikatave të Maqedonisë Shkup, për përcaktimin e së drejtës së pronësisë të pronls së pantundshme që përfaqëson një ndërtesë administrative si objekt me interes të përgjithshëm për shtetin. Me vendim merret shtëpia e punëtorëve nga LSM-ja dhe i ndahet shtetit.
Lidhja e Sindikatave të Maqedonisë reagoi lidhur me këtë vendim dhe kërkoi dorëheqjen e gjykatësve Shpend Devaja, Nake Georgiev, Isamedin Limani nga Gjykata Supreme të cilët kanë marrë aktvendim për konfiskimin e pronës së Sindikatës.
Kryetari i LSM-së Sllobodan Trendafilov tha se nëse gjyqtarët nuk japin dorëheqje do të fillojë procedurë për shkarkimin e tyre para Këshillit Gjyqësor.
