I dërguari kinez në OKB shprehu shqetësim të madh për planin e Izraelit për të marrë kontrollin e qytetit të Gazës, duke thënë se çdo përpjekje për të arritur këtë qëllim duhet të kundërshtohet me vendosmëri, shkruan “Xinhua”.
“Miratimi nga Kabineti i Sigurisë i Izraelit i një plani për të marrë kontrollin e qytetit të Gazës është një çështje e madhe shqetësuese”,- deklaroi përfaqësuesi i përhershëm i Kinës në Kombet e Bashkuara, Fu Cong, në një takim mbi çështjen palestinezo-izraelite të mbajtur nga Këshilli i Sigurimit i OKB-së, duke i kërkuar Izraelit të ndalojë menjëherë këtë veprim të rrezikshëm.
“Gaza i përket popullit palestinez. Është një pjesë integrale e territorit palestinez. Çdo veprim që synon të ndryshojë strukturën e tij demografike dhe territoriale duhet të përballet me refuzim dhe rezistencë të plotë”,- theksoi Fu.
Fu tha se mjetet ushtarake nuk janë mënyra për të zgjidhur konfliktin e gjatë dhe një armëpushim i menjëhershëm është e vetmja mënyrë e duhur për të shpëtuar jetë dhe për të siguruar lirimin e pengjeve.
Ai i bëri thirrje qeverisë izraelite të dëgjojë thirrjet e bashkësisë ndërkombëtare dhe popullit të saj, të ndalojë menjëherë përshkallëzimin e tensioneve dhe të përfundojë operacionet e saj ushtarake në Gaza.
“Vendet me ndikim të rëndësishëm mbi palët duhet të mbajnë një qëndrim të drejtë dhe të përgjegjshëm dhe të ndërmarrin hapa konkretë për të çuar përpara një armëpushim”, shtoi ai
Fu gjithashtu i kërkoi Izraelit të përmbushë detyrimet e tij sipas ligjit ndërkombëtar humanitar si një fuqi pushtuese; të hapë të gjitha kalimet kufitare; të heqë kufizimet në aksesin e ndihmës; të sigurojë hyrje në shkallë të gjerë, të shpejtë dhe të sigurt të furnizimeve humanitare në Gaza; dhe të mbështesë Kombet e Bashkuara në ofrimin e ndihmës sipas parimeve humanitare.
Fu e quajti zbatimin e zgjidhjes me dy shtete rrugën e vetme të qëndrueshme për zgjidhjen e çështjes palestineze dhe arritjen e bashkëjetesës paqësore midis Palestinës dhe Izraelit.
Në takim, plani i Izraelit për marrjen e Gazës shkaktoi protesta dhe dënime të gjera nga shumica e anëtarëve të Këshillit të Sigurimit
