Komandanti i përgjithshëm i ushtrisë së Iranit tha se do të ketë një “përgjigje të fortë” ndaj sulmeve të SHBA-së ndaj objekteve bërthamore të Iranit.
“Gjatë gjithë historisë sonë, ne jemi përballur me Amerikën shumë herë. Sa herë që ata janë përpjekur të vijnë për ne, ata kanë marrë një përgjigje të fortë”, tha Gjenerali Amir Hatami.
“Ne do të luftojmë; ne do të luftojmë për lumturi. Kemi pasur shumë martirë, por ne do të luftojmë me forcë dhe guxim. Ju duhet të jeni të sigurt për forcën tonë”, shtoi ai, shkruan CNN.
Bëhet e ditur se Hatami, një nga gjeneralët më të lartë të Iranit, u emërua në këtë rol më pak se një javë më parë, ndërsa Irani riorganizoi udhëheqjen e tij ushtarake për të plotësuar pozicionet e mbetura bosh pasi Izraeli vrau disa figura të larta në sulmet e tij të fundit.
Ndryshe, një paralajmërim e dha edhe zëdhënësi i Komandës së Përgjithshme Khatam al-Anbiya, Ebrahim Zolfaqari.
Ai tha se Uashingtoni do të duhet të paguajë çmimin për veprimet e tij.
“Pasoja serioze dhe operacione vendimtare ushtarake e presin Amerikën”, tha ai.
Zolfaqari iu drejtua ish-presidentit amerikan drejtpërdrejt në anglisht: “Trump, – ti mund ta kesh filluar këtë luftë, por ne do të jemi ata që do ta përfundojmë”.
