Ministria e Punëve të Brendshme hapi sot sesionin e tretë të Konferencës Ndërkombëtare për Administratë Publike – KosovaPAR2025, e cila këtë vit trajton temën “Capacity in Public Administration for or through AI?”, raporton Ekonomia Online.
Ministri në detyrë, Xhelal Sveçla, theksoi se Kosova po punon për ndërtimin e një administrate moderne, profesionale dhe transparente, duke e parë inteligjencën artificiale si partnere në këtë proces.
“Administrata është themeli i funksionimit të një shteti. Ne si qeveri kemi ndërmarrë hapa të rëndësishëm për të ndërtuar një administratë profesionale dhe transparente. Kemi miratuar strategji të qarta dhe kemi vizion për një administratë moderne, ku reformat vendosen në shërbim të qytetarëve, duke ofruar shërbime cilësore dhe duke kontribuar në zhvillimin e vendit.Do të shohim se si teknologjia mund të bëhet partnere.Kosova është e gatshme të mësojë nga praktikat ndërkombëtare, të shkëmbejë njohuri dhe të forcojë kapacitetet, në mënyrë që administrata jonë të mbetet në nivelin më të lartë”, tha ai.
Raportuesja e ftuar, prof. Catherine Althaus nga Universiteti i New South Wales, vlerësoi arritjet e Kosovës në reformën e administratës publike, duke e cilësuar konferencën një “festë intelektuale” me mbi 60 folës nga 24 vende.
“Është kënaqësi dhe privilegj i madh për mua që të shërbej si raportuese e ftuar në këtë konferencë kaq të rëndësishme këtu në Kosovë — një vend ku me të vërtetë ndjehet se gjithçka është e mundur. Së pari, më lejoni të shpreh falënderimet e mia për Republikën e Kosovës që ka mundësuar këtë rast për t’u mbledhur dhe reflektuar mbi ndërthurjen mes inteligjencës artificiale dhe administratës publike. Falënderim të veçantë gjithashtu për Ministrin e Arsimit, për Ministrin Jan-El Schwester dhe për Badal Dobra — mikpritësit tanë të sotëm. Përparimi i jashtëzakonshëm që Kosova ka arritur në reformën e administratës publike gjatë pesë viteve të fundit është një arritje e guximshme dhe frymëzuese, e cila i dedikohet profesionalizmit dhe përkushtimit të këtij ekipi. Kjo është vizita ime e tretë në Prishtinë, dhe më lejoni t’ju them: qoftë ky vendlindja juaj, apo vizita juaj e parë këtu, ju me siguri do të përjetoni diçka të veçantë gjatë ditëve në vijim. Ajo që është përgatitur mund ta quaj vetëm një festë intelektuale: mbi 60 folës nga 24 vende të ndryshme, secili duke sjellë pjesën e tij unike në mozaikun e qeverisjes së AI-së. Do të zhvillohen gjithashtu edhe punëtori praktike nga pionierët kosovarë të AI-së — prandaj ju inkurajoj që të përfitoni maksimalisht prej tyre. Gjatë konferencës, do të dëgjoni gjithçka: nga entuziazmi i zjarrtë i evangelistëve të teknologjisë, deri te kujdesi i menduar i praktikuesve me përvojë. Me pak fjalë, një paketë e plotë”, ka thwnw ajo.
Në kuadër të punimeve do të zhvillohen 14 panele, dy sesione kryesore dhe një tryezë e rrumbullakët me përfaqësues të lartë shtetërorë, diplomatë, akademikë dhe ekspertë ndërkombëtarë.
