Lady Gaga do të ngjitet në skenën e Grammy-t, ku do të bashkojë forcat me Bruno Marsin në një homazh për Los Anxhelosin, i cili është goditur nga zjarret shkatërruese.
Thashethemet se Gaga ishte në negociata për të performuar në Grammy qarkullonin prej ditësh dhe Akademia e Regjistrimit më në fund konfirmoi të premten se ajo dhe Marsi do t’ia kushtonin performancën e tyre qytetit dhe njerëzve të prekur nga zjarret e fundit. Paraqitja e tyre në skenën e Grammy-t vjen pasi dyshja janë në garë për dy çmime për këngën e tyre Die With a Smile – në kategoritë Kënga e Vitit dhe Performanca më e mirë Pop Duo/Grup.
Kënga, e lëshuar në gusht 2024, pati një sukses të madh, duke kaluar në krye të platformave të transmetimit dhe duke arritur numrin 1 në Billboard Hot 100 në fillim të vitit. Deri më tani, ajo ka qëndruar në krye të top-listave për katër javë rresht në vitin 2025.
Pak orë para se të konfirmohej performanca e saj në Grammy, Gaga dha një koncert special në FireAid, një ngjarje e mbajtur në Los Anxhelos për të mbledhur para për të prekurit nga zjarret shkatërruese. Ylli i popit e mbylli natën me tre këngë: Shallow dhe Always Remember Us This Way, si dhe një këngë krejt të re të titulluar All I Need Is Time. Ajo e shkroi këtë pjesë të veçantë me të fejuarin e saj, Michael Polansky, posaçërisht për këtë rast.
Kënga “Die With a Smile”
“Kur po mendoja se çfarë të këndoja sonte, doja diçka që do t’ju jepte shpresë,” i tha ajo publikut. “Mendova për këngët e mia, por asnjëra nuk më dukej e drejtë. Pra, unë dhe miku im Michael, i fejuari im, dashuria ime, e kemi shkruar këtë këngë për ju. Është vetëm për sonte, vetëm për ju. Unë mendoj se ne të gjithë kemi nevojë për shumë gjëra tani, por diçka që mund të na duhet gjithashtu është koha.
“Koha është shëruese”.
