Procesi i sigurimit dhe shpërndarjes së teksteve falas për nxënësit shqiptarë në diasporë ka përfunduar edhe për këtë vit shkollor.
Ministrja e Arsimit, Mirela Kumbaro përmes një postimi në rrjetet sociale tha se “vetëm këtë vit janë shpërndarë 27,198 tekste mësimore për nxënësit tanë në diasporë, ndërsa që nga viti 2019 e deri sot janë dërguar plot 117,138 tekste për fëmijët shqiptarë në çdo cep të botës”.
Ministrja Kumbaro u shpreh se “ruajtja e gjuhës dhe identitetit është mënyra më kuptimplotë për të mbajtur gjallë lidhjen me atdheun”.
“Prej 7 vitesh, qeveria shqiptare, përmes Ministrisë së Arsimit dhe Qendrës së Botimeve për Diasporën, kujdeset që fëmijët shqiptarë jashtë vendit të kenë në duar librat e gjuhës dhe kulturës amtare”, tha Kumbaro.
Ministria e Arsimit vazhdon të jetë e përkushtuar në mbështetjen e gjuhës dhe kulturës shqiptare në diasporë, duke siguruar që fëmijët të kenë mundësinë të mësojnë dhe të zhvillojnë gjuhën dhe kulturën e tyre amtare.
