Shkup, 2 shtator, argument.mk/ – Kryeministri Hristijan Mickoski ka deklaruar se pret nga Bullgaria të veprojë sipas fletë‑arrestit për babain e Iva Mihailovës dhe ta dorëzojë në Maqedoni, ku duhet të përballet me ligjin dhe drejtësinë.
Komentet e tij vijnë pas paraqitjes së të kërkuarit në mediat bullgare, ndonëse në Maqedoni ai kërkohet për të vuajtur një dënim me 12 vite burg për tentativë vrasjeje.
“Ne kemi fletë‑arrest dhe presim që partnerët tanë të veprojnë në përputhje me partneritetin, sepse jemi aleatë me fqinjin tonë lindor në NATO”, tha Mickoski.
Ai shtoi se pret që të gjithë personat që kërkohen me fletë‑arrest, të dyshuar ose të dënuar për vepra penale, të ekstradohen për t’u përballur me drejtësinë. “Vetëm në këtë mënyrë secili mund të dëshmojë fajësinë ose pafajësinë e tij”, theksoi kryeministri.
Rasti ka marrë vëmendje shtesë pasi babai i Iva Mihailovës foli publikisht në mediat bullgare për procesin gjyqësor që zhvillohet kundër vajzës së tij në Koçan.
