Shkup, 15 korrik – Euroambasadori Mihalis Rokas sot në takim me ministrin për Administratë Publike Goran Minçev përshëndeti miratimin e ligjeve reformuese për administratën si një sinjal pozitiv dhe inkurajues për përkushtimin e shtetit ndaj standardeve evropiane në administratën publike. Ai shprehu mbështetje edhe për ciklin e ri reformues, me një përpjekje të qartë për zbatimin e qëndrueshëm dhe transparent, në frymën e parimeve të menaxhimit të mirë.
Shërbimi për shtyp i Ministrisë së Administratës publike (MAP) njoftoi se në fokus të takimit të Minçevit dhe Rokasit ishte vlera e ligjeve reformuese të rëndësishme të miratuara më parë – Ligji për nëpunës administrativ, Ligji për të punësuar në sektorin publik, Ligji për zhvillim profesional dhe trajnim të nëpunësve publikë dhe Ligji për mbikëqyrje inspektuese, si bazë për ndërtimin e një administrate publike të drejtë, profesionale dhe të departizuar. Në takim plotësisht janë theksuar hapat e ardhshëm në drejtim të zbatimit të qëndrueshëm dhe efikas të ligjeve, përmes procesit transparent dhe me angazhim të fortë politik dhe institucional.
Ministri Minçev informoi ambasadorin Rokas edhe për përgatitjen e pakos së re të ligjeve reformuese, i cili, siç qëndron në kumtesë, do ta mbindërtojë dhe rrumbullakojë procesin e transformimit strategjik të administratës publike. Bëhet fjalë për Propozim-ligjin për sistem të pagave, Propozim-ligjin për shërbim të lartë udhëheqës dhe Ligjin për organizim dhe punë të organeve të administratës shtetërore.
“Ambasadori Rokas, përshëndeti miratimin e ligjeve si një sinjal pozitiv dhe inkurajues për përkushtimin e shtetit ndaj standardeve evropiane në administratën publike. Njëherit, u shpreh mbështetja edhe për ciklin e ri reformues, me përpjekje të qartë për zbatimin e qëndrueshëm dhe transparent, në frymën e parimeve të menaxhimit të mirë. Ministria e Administratës Publike dhe Delegacioni i BE-së konfirmuan përpjekjen e përbashkët për bashkëpunim të vazhdueshëm në drejtim të reformave të qëndrueshme dhe sistematike të cilat do të mundësojnë administratë publike efikase, të përgjegjshme dhe të orientuar drejt qytetarëve”, kumtoi ministria e Administratës Publike.
