Ministri i Jashtëm turk Hakan Fidan u takua të mërkurën me homologun e tij francez Jean-Noel Barrot në Paris për të diskutuar çështje dypalëshe dhe rajonale, transmeton Anadolu.
Dy ministrat kanë trajtuar gjerësisht çështje të ndryshme gjatë takimit të tyre të djeshëm, sipas burimeve të Ministrisë së Jashtme turke.
Fidan thuhet se ka theksuar rëndësinë e rritjes së koordinimit me vendet joanëtare të BE-së në formësimin e arkitekturës së re të sigurisë në Evropë.
Ai ka shprehur gjithashtu pritshmërinë e Türkiyes që Franca të mbështesë heqjen e barrierave artificiale që pengojnë marrëdhëniet Türkiye-BE dhe që BE-ja të ndërmarrë hapa konkretë në këtë drejtim. Është diskutuar gjithashtu përditësimi i Bashkimit Doganor Türkiye-BE të vitit 1995.
Fidan ka përsëritur mbështetjen e Türkiyes për përpjekjet diplomatike për t’i dhënë fund luftës Rusi-Ukrainë dhe ka theksuar rëndësinë e bashkëpunimit të ngushtë midis të gjithë aleatëve të NATO-s në këtë proces.
Ai ka nënvizuar se çdo zgjidhje e mundshme duhet të ketë pëlqimin e të dyja palëve për të qenë e qëndrueshme.
Lidhur me Sirinë, Fidan ka theksuar nevojën për një angazhim më të madh me administratën e re të vendit dhe ka bërë thirrje për heqjen e plotë të sanksioneve për të ndihmuar në rivendosjen e paqes dhe stabilitetit.
Ai ka përcjellë pritshmëritë e Türkiyes në lidhje me bashkëpunimin në industrinë e mbrojtjes dhe ka theksuar rëndësinë e luftimit të grupit terrorist PKK/YPG.
Fidan ka thënë gjithashtu se luftëtarët e huaj terroristë nga DEASH-i të mbajtur në burgje dhe kampe në veri të Sirisë duhet të kthehen në vendet e tyre.
– Kërcënimi rajonal i sulmeve izraelite në Gaza
Fidan ka paralajmëruar se sulmet në rritje të Izraelit mund të çojnë në paqëndrueshmëri rajonale dhe ka përsëritur kundërshtimin e Türkiyes ndaj çdo zhvendosjeje të detyruar të palestinezëve nga atdheu i tyre.
Ai ka ripohuar mbështetjen e Türkiyes për planin e Gazës të miratuar nga Liga Arabe, duke shtuar se pengimi i ndihmës humanitare nga Izraeli për Gazën po përkeqëson krizën humanitare.
Ai ka theksuar rëndësinë kritike të sigurimit të dërgimit të pandërprerë të ndihmave në Gaza.
Fidan dhe Barrot kanë diskutuar gjithashtu përpjekjet për të vendosur paqen dhe stabilitetin në Kaukaz.
Dy kryediplomatët kanë shqyrtuar hapat për forcimin e marrëdhënieve ekonomike dhe mundësitë për bashkëpunim në sektorin e energjisë.
Në lidhje me zhvillimet e fundit në Türkiye, Fidan ka kritikuar përdorimin e standardeve të dyfishta kundër Türkiyes dhe ka theksaur se proceset gjyqësore duhet të lejohen të ecin në rrjedhën e tyre, siç është parë kohët e fundit në Francë dhe Rumani.
Fidan ka thënë gjithashtu se Türkiye po monitoron nga afër zhvillimet në Francë.
