Shkup, 8 korrik, Zhurnal.mk – Edhe 2,4 milionë euro të reja janë orientuar drejt sektorit vendor të biznesit. Ministria e Financave ka kryer transferimin e 148,6 milionë denarëve në Bankën për Zhvillim, mjete që do të përdoren për mbështetjen e investimeve të kompanive maqedonase. Me pagesën e fundit, vlera totale e mjeteve të plasuar në ekonomi arriti në 14,5 miliardë denarë, respektivisht 235,8 milionë euro. Programi shtetëror për mbështetjen e kompanive vendore parashikon një buxhet total prej 250 milionë eurosh, ndërsa sipas vlerësimeve, këto mjete pritet të gjenerojnë një cikël investimesh me vlerë rreth 300 milionë euro. Mbështetja financiare është e dedikuar për kompanitë që synojnë të realizojnë investime të reja, të zgjerojnë prodhimin dhe të përshpejtojnë zhvillimin e tyre.
Kreditë për përfituesit finalë do të plasohen përmes bankave komerciale me kushte të favorshme – normë fikse interesi prej 1,95 për qind në vit, afat shlyerjeje deri në 15 vjet dhe periudhë grejs deri në tre vjet. Nga Ministria e Financave theksojnë se qëllimi është që përmes këtyre mjeteve të stimulohet iniciativa private, të hapen mundësi të reja për kompanitë dhe të jepet një nxitje shtesë për rritjen ekonomike.
