Shkup, 3 shtator – Gjykimi kundër Zoran Jovanovit, babait të Vasill Jovanovit, i cili në janar të këtij vitit, duke drejtuar automjetin pa patent shoferi dhe nën ndikimin e alkoolit, e goditi këmbësoren Frosina Kalukova, e cila humbi jetën në vendngjarje, vazhdon sot para Gjykatës penale themelore në Shkup.
Jovanov ndiqet për “rrezikim të sigurisë në komunikacion me veprime ose mjete të rrezikshme”, pasi prokuroria në seancën e fundit dëgjimore, bazuar në prova të marra, e ndryshoi aktakuzën, e cila fillimisht ishte “shkaktim i rrezikut të përgjithshëm”.
Seanca paraprake u anulua për shkak të mungesës së të akuzuarit, pasi që gjykata konstatoi se ishte thirrur në mënyrë të parregullt. Gjyqtarja Snezhana Markovska informoi se ishte dërguar kërkesë deri tek MPB-ja për të dhëna të përditësuara dhe për dorëzimin e duhur të ftesës.
Përveç të akuzuarit, në seancë nuk u paraqitën as avokati i tij Sasho Dukovski, e as dëshmitarja Sofija Çerepnalkovska, e cila, sipas informacionit nga babai i saj, ndodhej jashtë vendit.
Gjykata atëherë solli vendim për dërgimin e sërishëm të thirrjes së të akuzuarit dhe avokatit të tij, së bashku me propozim aktakuzën e ndryshuar.
