Partia në pushtet e presidentit Ilham Aliyev ka siguruar shumicën e vendeve në zgjedhjet e parakohshme parlamentare të organizuara në Azerbajxhan, njoftuan sot mediet lokale.
Partia e Azerbajxhanit të Ri të Aliyevit fitoi 68 nga 125 vendet në parlament, që do të thotë se do të mbajë pushtetin.
Zyrtarët vlerësuan pjesëmarrjen e votuesve prej 37,24% dhe thanë se zgjedhjet ishin zhvilluar pa incidente.
Votimi, i planifikuar fillimisht në nëntor, u zhvillua më herët – në mënyrë që të mos binte ndesh me Konferencën e OKB-së për Ndryshimet Klimatike që do të organizohet në Baku. Takimi pritet të mbledhë rreth 80 000 pjesëmarrës nga e gjithë bota.
Aliyev, i cili ka udhëhequr vendin që kur mori pushtetin nga babai i tij në 2003, siguroi një mandat të pestë në detyrë në fillim të këtij viti.
Azerbajxhani, një vend i pasur me naftë dhe gaz në Detin Kaspik, mbetet një furnizues i rëndësishëm i energjisë për Bashkimin Evropian.
