Prishtinë, 01 tetor, argument.mk/ – Kryetari i Komunës së Mitrovicës, Faton Peci, ka njoftuar se është iniciuar shkëputja e 27 kontratave për dhënien në shfrytëzim të pronave komunale.
Peci ka bërë të ditur se bëhet fjalë për kontrata të lidhura për periudha deri në 99 vjet, ndërsa sipas tij, disa prej përfituesve nuk kanë bërë investime në pronat e marra në shfrytëzim.
“Prona e Komunës nuk është për anëtarë të partisë, por për interesin e ekonomisë”, ka shkruar Peci.
Ai ka thënë se disa prej kontratave kanë kaluar çdo afat kohor të paraparë për realizimin e investimeve, duke theksuar se në disa raste nuk është investuar asnjë mjet deri në 10 vjet.
“Të gjitha pronat publike do të jenë në dispozicion për të gjithë, pa dallime e favorizime”, ka deklaruar Peci.
Kryetari i Mitrovicës nuk ka dhënë detaje të tjera në lidhje me pronat apo kontratat për të cilat është iniciuar procedura e shkëputjes.
