Porti i Durrësit, ka vijuar të shënojë rezultate pozitive të performancës edhe gjatë shtatëmujorit të vitit 2025.
Gjatë periudhës janar-korrik 2025, në kalatat portuale janë përpunuar mbi 2 milionë tonë mallra, duke regjistruar një rritje prej 6,3% krahasuar me të njëjtën periudhë të vitit të kaluar.
Kjo rritje përkthehet në rreth 138 mijë tonë më shumë mallra të përpunuara, një tregues i qartë i rolit të konsoliduar të portit në zinxhirin e furnizimit kombëtar dhe rajonal.
Të dhënat e Autoritetit Portual Durrës tregojnë se 1,759,072 tonë mallra kanë hyrë në Shqipëri përmes portit, ndërsa 536,901 tonë janë eksportuar drejt tregjeve ndërkombëtare.
Ky bilanc nënvizon rëndësinë strategjike të portit si një nyje furnizimi për ekonominë e vendit dhe njëkohësisht si portë dalëse për eksportet shqiptare. Një nga prirjet më të dukshme të këtij shtatëmujori është rritja me rreth 30% e importeve, e cila reflekton kërkesën e shtuar të tregut vendas dhe forcimin e pozitës së Portit të Durrësit si qendër logjistike dhe tregtare e rajonit.
Sektori i përpunimit të kontejnerëve ka vijuar të shënojë rezultate të qëndrueshme. Vetëm në periudhën janar–korrik 2025 janë përpunuar 128,213 njësi kontejnerike (TEU), duke regjistruar një rritje mesatare prej 9% në krahasim me të njëjtën periudhë të vitit 2024. Ky tregues pasqyron jo vetëm rritjen e fluksit të mallrave, por edhe zhvillimin e shërbimeve logjistike dhe efikasitetin operativ të portit.
Gjatë shtatëmujorit të këtij viti është shënuar rritje prej 4% në fluksit të hyrje-daljeve të udhëtarëve, krahasuar me të njëjtën periudhë të vitit të kaluar. Në hyrje të vendit janë regjistruar 195,310 pasagjerë, ndërsa 157,229 udhëtarë kanë zgjedhur tragetet e linjave Durrës-Itali për të udhëtuar jashtë vendit.
Në një panoramë më të gjerë, duke marrë në konsideratë periudhën korrik 2024 – korrik 2025, trafiku i pasagjerëve ka shënuar një rritje kumulative prej 6%, duke konfirmuar rolin e rëndësishëm të Portit të Durrësit si një pikë e rëndësishme hyrëse për turistët dhe vizitorët që zgjedhin Shqipërinë.
Rezultatet e qëndrueshme të këtij shtatëmujori tregojnë qartë kapacitetin dhe potencialin e Portit të Durrësit për t’iu përgjigjur kërkesave në rritje të tregut, sfidave të transportit ndërkombëtar dhe zhvillimit të ekonomisë kombëtare.
Këto tregues përforcojnë vizionin e qeverisë shqiptare për transformimin e kompleksit portual Durrës–Porto Romano në një qendër moderne, konkurruese dhe me rëndësi strategjike jo vetëm për Shqipërinë, por për të gjithë rajonin.
