Komuna e Gjilanit njofton se kanë nisur investimet për rinovimin e tërësishëm të Palestrës së Sporteve në Gjilan.
Këto investime për renovimin e tërësishëm të sallës kapin vlerën prej 2.7 milionë euro, derisa kryetari i komunës, Alban Hyseni, tha se ky është një projekt që shpejt bëhet realitet për qytetin dhe për sportistët që na frymëzojnë çdo ditë.
“Me një investim prej 2.7 milionë eurosh, palestra do të marrë një pamje krejt të re, moderne e dinjitoze, siç i ka hije. Për kampionët tanë, për krenarinë tonë të përbashkët, për Lojërat Mesdhetare 2030, për Gjilanin që duam”, tha kryetari Hyseni.
I pari i Gjilanit, theksoi se kjo palestër mbi një dekadë ka qenë në gjendje të mjerueshme, pa ngrohje, pa klimatizim dhe pa kushte të mira për përgatitjen e sportistëve. Po ashtu, sipas tij edhe kulmi ka pikur vazhdimisht.
“Me renovimin e tërësishëm të palestrës, duke përfshirë edhe pjesën e jashtme, sportistëve tanë i krijohen kushte të shkëlqyera për t’u stërvitur, për të shkëlqyer dhe për të na bërë krenarë”, tha kryetari Hyseni.
