Qendrat shëndetësore verore të hapura në zonat turistike të vendit vijojnë të ofrojnë kujdes shëndetësor cilësor për pushuesit dhe turistët.
Një ndër këto qendra është edhe ajo në Gjirin e Lalëzit, ku mjekët dhe infermierët ofrojnë ndihmën e parë dhe këshilla shëndetësore për të gjithë ata që kanë nevojë.
Kryeministri Rama ndau sot momente nga puna që kryhet në këtë qendër shëndetësore, ku pushuesit marrin shërbim shëndetësor pranë vendit ku pushojnë.
“Qendrat shëndetësore verore 2025, në shërbim të turizmit. Në 36 qendra shëndetësore verore në të gjithë Shqipërinë, pushues vendas dhe të huaj kanë marrë shërbim mjekësor 24/7 gjatë sezonit turistik”, u shpreh Rama.
Disa pacientë që u vizituan në atë qendër shëndetësore u shprehën të kënaqur me shërbimin e stafit mjekësor.
“Shërbimi ishte i shkëlqyer, edhe mjekët dhe infermierët ishin shumë të mira”, u shpreh një prej pacientëve.
Gjithashtu pas vizitës në këtë qendër, pacientët referohen te mjekët specialistë.
“Erdha te qendra shëndetësore e Gjirit të Lalëzit dhe bëra një vizitë. Unë jam shumë i kënaqur për rregullin, për pastërtinë, për shërbimin nga të gjithë personeli. I falënderoj shumë”, u shpreh një pacient pasi bëri vizitën në këtë qendër shëndetësore.
Gjatë sezonit turistik veror janë në funksion të plotë 36 qendra shëndetësore në të gjithë vendin, nga veriu në jug. Ato garantojnë shërbim mjekësor 24 orë në ditë, 7 ditë në javë, për të gjithë pushuesit, vendas apo të huaj.
