Kryetari i Prishtinës, Përparim Rama, ka mirëpritur të martën në takim ambasadorin australian, Richard Mason Rodgers.
Rama ka shkruar në Facebook, se në takim kanë biseduar për mundësitë e bashkëpunimit ndërmjet Prishtinës dhe Australisë.
“Mirëprita në Odën e Kryeqytetit Ambasadorin Australian, Richard Mason Rodgers, i cili shërben në Kroaci dhe si ambasador jo-rezident në Kosovë. Diskutuam për mundësitë e bashkëpunimit ndërmjet Prishtinës dhe Australisë, veçanërisht në fushat e zhvillimit urban, inovacionit dhe qëndrueshmërisë”, ka pohuar ai.
Rama shtoi tutje se “Kryeqyteti ynë është gjithmonë i hapur për partneritete që sjellin ide të reja dhe përmirësojnë jetën e qytetarëve tanë”.
