Shkup, 15 korrik – Iniciativa “Saport Koçani” realizoi një donacion për Klinikën universitare për kirurgji plastike dhe rikonstruktive – Shkup dedikuar për të lënduarit në zjarrin në klubin “Puls” në Koçan më 16 mars të vitit 2025.
Siç kumtuan nga “Saport Koçanin”, donacioni është formalizuar me nënshkrimin e marrëveshjes për donacion dhe përfshin 100 komplete të T-LAB PRP KIT, 10 komplete të EXOMINE SMART KIT, katër pako me aminoacide dhe katër pako me proteina.
Vlera totale e donacionit është 286.120 denarë dhe është siguruar plotësisht përmes donacioneve nga qytetarë dhe kompani humane të cilët vazhdimisht e mbështesin iniciativën “Saport Koçani”.
“Materialet e donuara janë të dedikuara për trajtimin dhe rigjenerimin e lëkurës, përshpejtimin e shërimit të plagëve dhe përmirësimin e rikuperimit tek pacientët me lëndime të rënda nga djegiet. Mbështetja ushqyese është ndihmë shtesë për të forcuar trupin në procesin e rehabilitimit”, informon “Saport Koçani”.
Pajisjet dhe suplementet mjekësore tashmë janë dorëzuar në Klinikën universitare për kirurgji plastike dhe rikonstruktive- Shkup, ku përdoren në mënyrë aktive për trajtimin e të lënduarve.
Në kuadër të vizitës, ekipi i “Saport Koçani” vizitoi edhe pacientët që janë ende të hospitalizuar në klinikë dhe shprehu personalisht mbështetjen dhe urimet e tyre për shërim të shpejtë.
“Vazhdojmë me mbështetje të fokusuar, të drejtpërdrejtë dhe të përgjegjshme për çdo individ të prekur nga tragjedia. Ky bashkëpunim me një nga institucionet kyçe të kujdesit shëndetësor në vend paraqet një hap të rëndësishëm në ofrimin e kujdesit mjekësor profesional. Sinqerisht falënderojmë të gjithë qytetarët humanë, kompanitë dhe mbështetësit – sepse ata janë që e mundësuan këtë ndihmë”, theksojnë nga “Saport Koçani”.
Nga kjo iniciativë theksojnë se mbeten të përkushtuar ndaj “transparencës, partneritetit me institucionet dhe kujdesit afatgjatë për të gjithë personat e prekur”.
