Aktorja Sharon Stone i ka bërë thirrje bashkë-yllit Sydney Sweeney të marrë përgjegjësinë për reklamën kontroverse të platformës së basteve sportive Novig, e cila shkaktoi reagime të ashpra nga atletet femra.
Konkretisht, Sweeney u shfaq lakuriq në fushatën promovuese të Noviga këtë muaj, duke u mbuluar me pajisje sportive dhe duke thënë se platforma e basteve është “vetëm për sporte”.
Reklama tërhoqi kritika nga një pjesë e komunitetit sportiv, përfshirë sportiste të shquara të cilat e akuzuan aktoren për nënçmim dhe seksualizim të sporteve të grave.
Stone, e cila luajti përballë Sweeney në sezonin e tretë të “Euphoria”, foli për polemikat në një aktivitet në Los Angeles. Ajo tha se mbështet sportet e grave, por gjithashtu beson se Sweeney duhet të marrë përgjegjësi për veprimet e tij.
“Mendoj se i takon Sweeney-t të marrë përgjegjësinë për veprimet e saj, jo mua ta gjykoj për veprimet e saj”, tha Stone për People.
Ajo shtoi se fokusi i saj duhet të jetë në mbështetjen e grave që kanë pasur sukses dhe janë bërë kampione në sportet e grave.
“Nuk mund t’i nënvlerësojmë sportet e grave për të tërhequr vëmendjen e burrave në mënyrë që ata të mund të luajnë bixhoz”, tha Stone.
Reklama ka ngjallur reagime nga shumë atlete femra, përfshirë lojtaren olimpike të vaterpolos Tilly Kearns, boksieren Skye Nicolson dhe kampionen e notit Ariarne Titmus.
Titmus shprehu indinjatë për reklamën në Instagram, duke deklaruar se është një fyerje për gratë që ia kanë kushtuar jetën e tyre sportit, por edhe për të gjithë ata që shohin punën në grup, miqësinë, përkushtimin, përsosmërinë dhe unitetin në sport.
Sweeney iu përgjigj kritikave duke ndarë kopertinat e revistave dhe fushatat e kaluara reklamuese në të cilat atlete të famshme femra, përfshirë Serena Williams dhe Ronda Rousey, pozuan në mënyrë provokuese ose me shumë pak rroba.
Edhe drejtori ekzekutiv i Novigo-s, Jacob Fortinsky, iu përgjigj kritikave. Ai tha se platforma mbështet shumë sportet e grave dhe se fushata nuk kishte kurrë për qëllim të portretizonte sportet e grave.
“Sydney është aktore, ylli më i madh i filmit në botë. Ne jemi një treg parashikimesh i fokusuar te sporti. Kjo është historia që ajo po përcillte”, tha Fortinsky.
Stone ka folur më parë për polemikat që lidhen me Sweeney-n. Vitin e kaluar, ajo e mbrojti aktoren pas reagimeve të ashpra për reklamën e saj të xhinseve American Eagle, duke thënë se ishte në rregull të përdorte atë që i jepte gjenetika e saj.
“Është vërtet në rregull të përdorësh çdo grimcë tërheqjeje që ke këtu, tani për tani”, tha Stone në atë kohë.
