Shkup, 31 gusht, argument.mk/ – Ministri i Drejtësisë, Jeton Shasivari, zhvilloi takim pune me ambasadoren e Republikës së Kroacisë në Maqedoni, Nives Tiganj, ku u diskutua për forcimin e bashkëpunimit në fushën e drejtësisë, sundimit të ligjit dhe procesit të integrimit evropian.
Në takim u shqyrtuan aktivitetet aktuale reformuese dhe prioritetet e ardhshme në kuadër të zbatimit të Agjendës së Reformave, me fokus të veçantë në harmonizimin e legjislacionit me të drejtën e Bashkimit Evropian, shkëmbimin e përvojave dhe forcimin e bashkëpunimit institucional.
Ministri Shasivari vlerësoi përvojën e Kroacisë në procesin e anëtarësimit në Bashkimin Evropian, duke e cilësuar atë si një përvojë të rëndësishme për Maqedoninë në zbatimin e reformave dhe përmbushjen e standardeve evropiane.
“Kroacia është mike dhe mbështetëse e jona në rrugën drejt integrimit evropian. Përvoja e saj në procesin e anëtarësimit në BE është një vlerë e rëndësishme që mund ta shfrytëzojmë në procesin tonë reformues”, theksoi Shasivari.
Në takim u konfirmua gatishmëria e përbashkët për vazhdimin dhe thellimin e bashkëpunimit ndërmjet dy vendeve, veçanërisht përmes shkëmbimit të njohurive dhe përvojave në fushën e drejtësisë, me synim avancimin e reformave dhe përshpejtimin e procesit të integrimit evropian.
