Tiranë, 27 gusht, argument.mk/ – Viti i ri shkollor, i cili nis më 14 shtator, pritet t’i gjejë nxënësit e gjimnazit “Qemal Stafa” në Tiranë nën masa të shtuara sigurie, përmes kombinimit të pranisë fizike të oficerëve të sigurisë dhe sistemeve inteligjente të monitorimit.
Përmes projektit Smart City, në këtë shkollë ka përfunduar instalimi i kamerave dhe pajisjeve inteligjente, të cilat synojnë evidentimin e rasteve të paligjshmërisë dhe rritjen e sigurisë në ambientet e shkollës.
Ministri i Punëve të Brendshme, Besfort Lamallari, gjatë një vizite në gjimnaz, tha se “Qemal Stafa” është ndër shkollat e para që përfiton nga zbatimi i programit Smart City, i cili kombinon teknologjinë e avancuar me përdorimin e inteligjencës artificiale.
“Transformojmë sigurinë publike në vend përmes projektit Smart City. Në gjimnazin “Qemal Stafa” ka përfunduar instalimi i kamerave dhe pajisjeve inteligjente për të detektuar çdo paligjshmëri. Viti i ri shkollor nis më i sigurt për nxënësit, mësuesit dhe prindërit”, tha ai.
Sipas Lamallarit, sistemi i ri do të ofrojë një nivel më të lartë sigurie për nxënësit dhe mësuesit, ndërsa do t’u japë më shumë qetësi edhe prindërve.
“Jemi për të parë nga afër pikërisht fillimin e zbatimit të programit Smart City për sigurinë në shkolla, ku gjimnazi “Qemal Stafa” dhe nxënësit që e frekuentojnë atë do të jenë ndër të parët që me të vërtetë profitojnë pikërisht nga siguria e shtuar përmes përdorimit të teknologjisë më të avancuar që shfrytëzohet nga programi Smart City, e kombinuar kjo me përdorimin e inteligjencës artificiale”, u shpreh ministri.
Lamallari theksoi se teknologjia e re do të funksionojë krahas oficerëve të sigurisë në shkolla. Në gjimnazin “Qemal Stafa”, sipas tij, janë të angazhuar aktualisht dy oficerë sigurie.
“Kjo nënkupton më shumë siguri, jo vetëm për nxënësit, por edhe qetësi për prindërit e këtyre nxënësve, të cilët tashmë janë sigurisht nën mbrojtjen e këtij programi. Kjo i shtohet përpjekjeve të qeverisë shqiptare, krahas oficerëve të sigurisë në shkolla, dhe aktualisht në këtë gjimnaz kemi dy oficerë, të cilët së bashku me teknologjinë e avancuar tashmë, nga data 14 shtator ku fillon dhe viti i ri, ne i urojmë vetëm suksese dhe për sigurinë, sigurisht është përgjegjësia jonë”, tha ai.
Drejtoresha e gjimnazit “Qemal Stafa” vlerësoi mbështetjen për forcimin e sigurisë në shkollë.
“Edukimi cilësor ecën më së miri edhe me mjedise më të sigurta, të cilat në shkollën tonë janë krijuar më së miri”, u shpreh ajo.
Zbatimi i teknologjive të reja të sigurisë në shkolla synon të krijojë një mjedis më të mbrojtur për nxënësit dhe mësuesit, duke i dhënë prindërve më shumë siguri dhe besim në nisjen e vitit të ri shkollor.
