Shkup, 15 mars – Kryetari i Aleancës për Shqiptarët dhe kandidati i koalicionit VLEN për president në zgjedhjet e Maqedonisë së Veriut, Arben Taravari në paraqitjet e fundit në media thotë se kanë nisur debat mbarëpopullor ndërmjet dy etnive më të mëdha në Maqedoni, për një Kushtetutë të re.
“Kushtetuta të cilën Arbën Xhaferi e thoshte se është gjenerator i krizës në Maqedoni, e kanë votuar vetëm maqedonasit në vitin 1991 dhe shqiptarët nuk e kanë votuar dhe kanë abstenuar. Mendoj se bashkë me bashkëqytetarët tanë maqedonas dalë nga dalë duhet t’i hapim disa çështje”, tha Taravari.
Sipas Taravarit, Kushtetuta e re duhet të jetë reflektim i realitetit të popullatës të demografisë. “Kushtetuta duhet të jetë reflektim i realitetit të popullatës të demografisë në mënyrë që të jetë më funksionale dhe çdo qytetar i Maqedonisë, pavarësisht etnisë, ta ndjen atë shtet sikur të vetin. Kështu ekziston segregimi dhe ne duhet ta mendojmë seriozisht dhe ta hapim debatin për ndryshimet kushtetuese, jo vetëm për futjen e bullgarëve, por presidenti Pendarovski tha para disa muajsh se nuk është keq që ne të mendojmë për një Kushtetutë të re”, tha Taravari.
