Presidenti i SHBA-së, Donald Trump dëshiron të sigurojë një armëpushim në luftën e Rusisë kundër Ukrainës deri në Pashkë, raportoi Bloomberg më 16 shkurt, duke cituar zyrtarë të paidentifikuar.
Trump ka premtuar më parë se do t’i japë fund luftës në Ukrainë brenda 24 orëve.
Por që nga fitorja e tij në zgjedhjet presidenciale në SHBA, ky afat kohor është “rishikuar”, shkruajnë mediat e huaja, përcjell Telegrafi.
Dhe tani, administrata e SHBA-së u ka thënë zyrtarëve evropianë se shpreson të arrijë një marrëveshje armëpushimi deri në Pashkë, e cila bie më 20 prill, raportoi Bloomberg.
Megjithatë, plani i Trump për një zgjidhje të shpejtë për t’i dhënë fund luftës së Rusisë kundër Ukrainës është ambicioz dhe “potencialisht jorealist”, ka vlerësuar një burim i paidentifikuar.
Sidoqoftë, gjatë javës së kaluar, SHBA-ja ka bërë disa lëvizje për të çuar përpara agjendën e saj në raporto me luftën Rusi-Ukrainë – disa prej të cilave kanë alarmuar zyrtarët evropianë dhe ukrainas.
Trump foli me presidentin rus Vladimir Putin në një telefonatë më 12 shkurt, duke zhvilluar një telefonatë të veçantë me presidentin Volodymyr Zelensky më vonë të njëjtën ditë.
E i dërguari special i presidentit amerikan Donald Trump për Ukrainën dhe Rusinë, Keith Kellogg, tronditi liderët evropianë më 15 shkurt kur tha se Evropa nuk do të përfshihet drejtpërdrejt në negociatat e paqes midis Rusisë dhe Ukrainës.
