Presidenti amerikan Donald Trump ka urdhëruar një taksë importi prej 25 për qind për të gjithë çelikun dhe aluminin që hyjnë në SHBA, në një zgjerim të madh të barrierave ekzistuese tregtare.
Tarifat, të cilat do të rrisin kostot e importimit të metaleve në SHBA, vijnë pavarësisht paralajmërimeve për hakmarrje nga disa liderë politikë në Kanada – furnizuesi më i madh amerikan i metaleve – si dhe vende të tjera, transmeton Telegrafi.
Bizneset amerikane të varura nga importet kanë ngritur gjithashtu shqetësime, por Trump ka thënë se planet e tij do të nxisin prodhimin vendas.
Ai paralajmëroi se nuk do të kishte përjashtime, duke thënë se po “thjeshtonte” rregullat, të cilat janë vendosur të hyjnë në fuqi më 12 mars.
“Kjo është një punë e madhe, fillimi për ta bërë Amerikën të pasur përsëri”, tha Trump.
“Kombi ynë kërkon që çeliku dhe alumini të prodhohen në Amerikë, jo në vende të huaja”, shtoi ai.
I pyetur nëse tarifat mund të rrisin çmimet për konsumatorët, presidenti amerikan u përgjigj: “Përfundimisht do të jetë më e lirë”.
“Është koha që industritë tona të mëdha të kthehen në Amerikë, kjo është e para nga shumë”, shtoi ai, duke sugjeruar se tarifat e tjera mund të fokusohen në farmaceutikë dhe çipa kompjuterikë.
SHBA është importuesi më i madh në botë i çelikut, duke numëruar Kanadanë, Brazilin dhe Meksikën si tre furnizuesit kryesorë të saj.
