Ministri i Jashtëm ukrainas, Andriy Sybiha dhe homologu i tij izraelit Gideon Saar, i cili po viziton Ukrainën, njoftuan sot fillimin e një “dialogu” midis vendeve të tyre për të luftuar së bashku “kërcënimin iranian”.
“Irani dhe Rusia përbëjnë një kërcënim ekzistencial jo vetëm për vendet tona, por gjithashtu për sigurinë globale”, tha Sybiha.
Ai vlerësoi se Moska, Teherani dhe Koreja e Veriut, të cilat dërguan ushtarë për të luftuar ushtrinë ukrainase përkrah forcave ruse, përbëjnë “një aleancë regjimesh keqdashëse që mbështesin njëra-tjetrën dhe kërcënojnë botën e lirë”.
“Përballë këtyre kërcënimeve, ne ramë dakord të intensifikojmë bashkëpunimin shumëpalësh dhe dypalësh. Dhe vendosëm sot të nisim një dialog të veçantë mbi kërcënimin iranian”, shtoi ministri ukrainas.
Ai foli për moment të rëndësishëm në bashkëpunimin në fushën e “teknologjive të mbrojtjes” midis Izraelit dhe Ukrainës, e cila sipas tij është bërë vendi i parë në botë që prodhon avionë ushtarakë pa pilot (dronë) pas pushtimit rus në shkurt 2022.
Nga ana e tij, Gideon Saar deklaroi se të dy vendet do të “vazhdojnë” të forcojnë “miqësinë e tyre” dhe “të mbështesin njëri-tjetrin”, duke ftuar homologun e tij ukrainas të vizitojë vendin e tij.
Ai siguroi se Izraeli “mbështet” Ukrainën në luftën kundër Rusisë, duke dënuar “sulmet ruse kundër civilëve” dhe se ka ofruar ndihmë humanitare dhe ka dërguar specialistë për “stresin post-traumatik” në Ukrainë.
“Dy vendet tona po kalojnë kohë të vështira, kohë sprovash, ata janë “përballur me luftë dhe vuajtje”, tha ai, duke kujtuar se shumë izraelitë janë me origjinë ukrainase.
Pas sulmit në shkallë të gjerë rus ndaj Ukrainës, Izraeli kishte mbajtur një qëndrim neutral dhe nuk vendosi sanksione ndaj Rusisë ndryshe nga shumë vende të tjera perëndimore.
Por marrëdhëniet e tij me Moskën janë përkeqësuar për shkak të forcimit të aleancës midis Rusisë dhe Iranit, i cili akuzohet për furnizimin e Kremlinit me dronë sulmues dhe luftës së Izraelit në Rripin e Gazës, të cilën autoritetet ruse e kanë dënuar.
Gideon Saar falënderoi qeverinë ukrainase për vendosjen e sanksioneve ndaj zyrtarëve të lartë iranianë, shprehu mbështetje për bombardimet izraelite të Iranit, “dënoi Hamasin” dhe mbështeti të drejtën e Izraelit “për t’u vetëmbrojtur”.
