Shkup, 26 gusht, argument.mk/ – Ministri i Politikës Sociale, Demografisë dhe Rinisë, Gjoko Velkovski, së bashku me kryetarin e Komunës së Gjevgjelisë, Andon Saramandov, dhe sekretarin e përgjithshëm të Kryqit të Kuq të Republikës së Maqedonisë së Veriut, Sait Saiti, morën pjesë sot në hapjen e Qendrës për qëndrim ditor të të moshuarve me plakje aktive në këtë komunë.
Qendra është themeluar përmes Projektit për përmirësimin e shërbimeve sociale të Ministrisë së Politikës Sociale, Demografisë dhe Rinisë. Aplikues është Komuna e Gjevgjelisë, ndërsa ofrues i shërbimit është Kryqi i Kuq i RMV – Organizata komunale Gjevgjeli.
Me hapjen e Qendrës do të ofrohet shërbim social i qasshëm, cilësor dhe i vazhdueshëm për personat mbi 65 vjeç, veçanërisht për ata që jetojnë vetëm ose me bashkëshort, janë të ekspozuar ndaj rrezikut të vetmisë dhe izolimit social, ose kanë nevojë për mbështetje ditore, shoqërim dhe mënyrë aktive jetese.
Qendra ka kapacitet për 50 përdorues dhe do të funksionojë pesë ditë në javë. Aktivitetet do të organizohen sipas nevojave dhe interesave individuale të përdoruesve, duke përfshirë programe sociale, kulturore, edukative, kreative, rekreative dhe shëndetësore‑preventive.
“Qëllimi ynë është që shërbimet sociale të jenë sa më afër qytetarëve dhe të krijojmë kushte që çdo njeri, pavarësisht moshës, të ketë mundësi për jetë dinjitoze, aktive dhe cilësore. Qendrat e këtij lloji nuk ofrojnë vetëm qëndrim ditor, por krijojnë hapësirë për shoqërim, aktivitete, mbështetje dhe rikonektim me komunitetin”, theksoi ministri Velkovski.
Qendra është e pajisur me hapësira për shoqërim, pushim dhe aktivitete grupore, kuzhinë të plotësisht të pajisur, si dhe kushte për lëvizje të sigurt të përdoruesve.
Ministria e Politikës Sociale, Demografisë dhe Rinisë njoftoi se hapja e Qendrës është dëshmi se me bashkëpunim mes institucioneve, vetëqeverisjes lokale dhe organizatave që punojnë drejtpërdrejt me qytetarët, mund të krijohen shërbime që kanë ndikim real dhe të drejtpërdrejtë në cilësinë e jetës së njerëzve.
