Shkup, 27 gusht, argument.mk/ – Venko Filipçe tani mburret me vendimin e Islam Abazit që të mos ngrejë aktakuzë kundër tij për 19 spitale modulare, mes të cilave edhe spitali modular në Tetovë, ku në zjarr humbën jetën 14 persona. Kur duhej të përgjigjej para ligjit për spitalet modulare, të cilat u vendosën pa respektuar Ligjin për ndërtim dhe pa respektuar opinionin profesional, pikërisht ai sistem, që LSD dhe BDI e formësuan për t’u shërbyer interesave të tyre, e shpëtoi Filipçen nga përgjegjësia, thuhet në komunikatën e VMRO‑DPMNE.
“Filipçe flet për BE, sundim të ligjit dhe vlera evropiane, ndërkohë që i referohet sistemit që LSD dhe BDI e shkatërruan derisa ishin në pushtet. LSD dhe BDI e çuan gjyqësorin në nivel besimi nën 2%, ndërsa Islam Abazi, i vendosur në kohën e tyre, mori vendim që e liroi Filipçen.
Ai sistem, i cili është jofunksional dhe pjesë e të cilit është edhe Islam Abazi, Filipçe tani e përdor si argument: një ditë flet për Maqedoni evropiane dhe sundim të ligjit, ndërsa ditën tjetër gëzohet për vendimin e prokurorisë që nuk ngre aktakuzë kundër tij.
BE kërkon gjyqësor të pavarur, por në vend të kësaj, Filipçe e feston vendimin e një prokurori të vendosur në sistemin kredibilitetin e të cilit vetë ai ka kontribuar ta rrënojë. Ato 2% besim në gjyqësor, në vend që të jenë alarm, për të duket se janë “dëshmi” se është i pastër. Për Filipçen, Maqedonia evropiane do të thotë prokurori që vepron sipas interesave të tij.
Ky lloj vendimesh i shkakton dëm shtetit në procesin e integrimit evropian dhe në përparimin e sundimit të ligjit”, qëndron në komunikatën e VMRO‑DPMNE.
