Gostivar, 7 mars – Zëvendësministri i Bujqësisë, Flakron Bexheti, zhvilloi sot një takim me bujqit e fshatit Çegran dhe përfaqësuesit e bashkësisë lokale, ku u diskutuan sfidat me të cilat përballen fermerët, si dhe hapat konkretë për përmirësimin e kushteve të tyre të punës.
Një nga çështjet kryesore që u ngrit gjatë takimit ishte përmirësimi i infrastrukturës bujqësore, me theks të veçantë në rikthimin e funksionalitetit të kanalit të ujitjes nga lumi Vardar dhe asfaltimin e rrugës që lidh fshatin me fushat. Fermerët theksuan se këto investime do të ndihmojnë drejtpërdrejt në rritjen e prodhimit dhe përmirësimin e kushteve të punës.
Zëvendësministri Bexheti u njoh nga afër me propozimet dhe shqetësimet e bujqve, duke theksuar angazhimin e tij për të gjetur zgjidhje konkrete dhe të qëndrueshme. Ai ritheksoi rëndësinë e një dialogu të hapur dhe të vazhdueshëm me fermerët, me qëllim që politikat bujqësore të reflektojnë nevojat reale të tyre.
“Do të angazhohemi maksimalisht që kërkesat e fermerëve të adresohen dhe të ofrojmë zgjidhje konkrete, duke përmirësuar kushtet e punës dhe infrastrukturën bujqësore,” tha Bexheti.
Ky takim është pjesë e përpjekjeve të Ministrisë së Bujqësisë për të mbështetur bujqit në mënyrë efektive dhe për të krijuar kushte më të mira për zhvillimin e sektorit bujqësor në vend.
