Shefi i Shtabit të ushtrisë izraelite pranoi se ushtria nuk arriti të parandalonte sulmin e befasishëm të nisur nga grupi palestinez Hamas më 7 tetor 2023 dhe mban përgjegjësi për këto ndodhi, transmeton Anadolu.
“Dëshiroj të sqaroj, siç kemi thënë që nga dita e parë, ne dështuam më 7 tetor. Ne nuk morëm përgjegjësi. Përgjegjësia është e jona për atë që ka ndodhur dhe çfarë do të ndodhë nga këtu e tutje”, tha Herzi Halevi në një deklaratë.
Ai shtoi se “garantimi i sigurisë për banorët e Izraelit është një detyrë që do të marrë shumë kohë. Kemi ende një rrugë të gjatë për të bërë për të arritur qëllimet e luftës”.
Lidhur me luftimet në Gazën jugore, ai pretendoi se ushtria vrau dhe kapi shumë udhëheqës të Hamasit në qytetin Khan Younis.
“Ushtria po përgatitet të nisë sulme në zona të tjera dhe ne do të vendosim me nivelin politik kohën dhe rrethanat”, shtoi ai.
Izraeli ka zhvilluar një ofensivë ushtarake vdekjeprurëse në Gaza që nga sulmi ndërkufitar i Hamasit më 7 tetor 2023.
Që atëherë, në Gaza janë vrarë më shumë se 31.600 palestinezë, kryesisht gra dhe fëmijë, ndërsa rreth 73.700 të tjerë janë plagosur.
Sipas OKB-së, lufta izraelite ka zhvendosur 85 për qind të popullsisë së Gazës, mes një bllokade shkatërruese të produkteve ushqimore, ujit të pastër dhe ilaçeve, ndërsa 60 për qind e infrastrukturës së enklavës është dëmtuar ose shkatërruar.
Izraeli akuzohet për gjenocid në Gjykatën Ndërkombëtare të Drejtësisë. Një vendim i përkohshëm në janar urdhëroi Tel Aviv-in të ndalojë aktet gjenocidale dhe të marrë masa për të garantuar ofrimin e ndihmës humanitare për civilët në Gaza.
