Shkup, 7 prill – Zëvendëskryeministri Izet Mexhiti paralajmëron se gjatë ditës së sotme do të lëshohen rrogat për 17 të punësuarit në Inspektoratin për Përdorimin e Gjuhëve, të cilët për shkak të ndryshimeve të Ligjit për Mbikëqyrje Inspektuese, siç alarmoi Alsat, tre muaj kanë mbetur pa rrogë.
“Ndërsa për rrogat mendoj që sot marrin rrogën e parë dhe në mënyrë etapore do t’i marrin edhe dy të tjerat”, tha Izet Mexhiti, zëvendëskryeministër.
Ndryshimet e Ligjit për Mbikëqyrje Inspektuese të miratuara në dhjetor, të gjitha inspektorateve ua heq statusin juridik dhe i vendos nën kompetenca të Ministrive. Këtë, e pësoi dhe Inspektorati për Përdorimin e Gjuhëve edhe pse statusi i tij juridik garantohet me nene të posaçme në Ligjin për Përdorimin e Gjuhëve dhe Ligji për Inspektoratin për Përdorimin e Gjuhëve. Mexhiti, për këtë paralajmëron se gjatë javës së ardhshme do të propozohet zgjidhje e re ligjore për të rregulluar statusin e Inspektoratit që të mos jetë në kuadër të Ministrisë, por të jetë në kuadër të Agjencisë për Zbatimin e Gjuhëve.
“Inspektorati i Gjuhëve për shkak që ka të bëjë me identitetin, që ka të bëjë me gjuhët, mendojmë që vlerësimi i VLEN-it është që duhet të jetë në kuadër të Agjencisë së Gjuhëve sepse janë dy institucione komplementare që plotësojnë njëra tjetrën dhe besoj që për këtë do të dalim me zgjidhje ligjore brenda kësaj jave”, u shpreh Izet Mexhiti, zëvendëskryeministër.
Prej 1 janarit të këtij viti, sipas ligjeve në fuqi Inspektorati për Përdorimin e Gjuhëve është në një situatë absurde – edhe ka, edhe nuk ka status juridik.
Ministria e ka marrë buxhetin e Inspektoratit, i mbulon shpenzimet vijuese, por deri tani nuk ka lëshuar rroga pasi nuk është rregulluar statusi i të punësuarve të pasi të njëjtit duhet të bëjnë transferim në Ministrinë e Drejtësisë.
Por edhe kjo nuk mund të bëhet, pas Ministria e Financave nuk jep pajtueshmëri, pikërisht për shkak se nuk janë harmonizuar ligjet.
