Shkup, 22 qershor – Tashmë është shpallur thirrja publike për blerjen e 120 autobusëve ekologjikë elektrikë dhe në përputhje me ligjin për prokurim publik, ofertat mblidhen në afat prej 30 ditësh dhe duhet të arrijnë deri në mes të korrikut, njoftoi sot zëvendëskryeministri dhe ministër i Transportit, Aleksandar Nikolloski.
Autobusët, siç tha, do të vijnë me stacione karikimi.
“Planifikohet që në çdo dy autobusë të ketë të paktën një stacion karikimi, që do të thotë se i gjithë sistemi është i mirëmenduar. Shpresoj se do të kemi konkurrencë më të madhe dhe se më shumë kompani do të aplikojnë për thirrjen. Kështu do t’i kishim autobusët më të mirë dhe më modernë me çmimin më të mirë”, tha Nikolloski në pyetjen e gazetarit gjatë vënies në punë të rrugës rajonale të rikonstruktuar Ponov Most – Bogdanc, ku mori pjesë edhe kryeministri Hristijan Mickoski.
Nga 120 autobusët, siç tha ai, 80 pritet të jenë të destinuar për transportin urban në kryeqytet, ndërsa 40 të tjerët do të shpërndahen në komunat që ofrojnë transport publik.
“Në këtë mënyrë shpresoj se do të ndihmojmë jo vetëm që qytetarët të shkojnë më shpejt dhe me efikasitet në komunat e tyre, por edhe të mbrojmë mjedisin sepse këta janë autobusë tërësisht elektrikë që duhet të ulin një pjesë të madhe të ndotjes.
