Deputeti i Partisë Demokratike, Flamur Noka ka kërkuar sot gjatë seancës plenare që në punimet e Kuvendit në këtë sesion parlamentar të përfshihen edhe diskutimet për zgjedhjen e Avokatit të Popullit.
Noka tha se në këtë sesion ka qenë parashikuar që të votohen kandidaturat për Avokatin e Popullit, por sipas tij është tejkaluar çdo procedurë e nevojshme parlamentare dhe çdo afat.
“Në një bisedë me kryetarin e grupit parlamentar të PS është lënë që pas zgjedhjeve, kandidaturat të kalohen për votim. Në kalendarin e këtyre dy javëve nuk ekziston votimi i kandidaturave të Avokatit të Popullit. Respektoni rregulloren, futeni në rend të ditës votimin e kandidaturave për Avokatin e Popullit”, tha Noka.
Nga ana e saj, kryeparlamentarja Elisa Spiropali tha se nuk ka asnjë informacion që është rënë dakord me grupet parlamentare, apo që ka pasur diskutime mbi emrat apo emrin e Avokatit të Popullit për t’u votuar në seancë.
Ndërkohë, kreu i grupit parlamentar të PS-së, Niko Peleshi u shpreh se ka kërkuar që të bëhet me transparencë procesi i zgjedhjes së krerëve të institucioneve të pavarura.
“Pra, të ulemi, të dëgjojmë propozimet e opozitës duke respektuar edhe traditën që propozimet vijnë nga opozita. Por, mazhoranca ka të drejtën që përpara se të votojë të njihet me të gjithë, të bëjë një diskutim dhe të arrihet dakordësia. Të gjitha propozimet e ardhura që kanë kaluar procesin deri në komisione janë të propozuara nga opozita dhe për këtë arsye ne duhet të zhvillonim bisedime. Kam bërë një bisedë me Nokën në një nga seancat dhe e lamë që ta rimarrim pas zgjedhje. Ka ngelur vetëm një seancë dhe duket më e mundshme që procesi të rimerret në shtator”, tha Peleshi.
