Shkup, 28 qershor – Kryetari i Lidhjes Socialdemokrate të Maqedonisë, Venko Filipçe, sot do të marrë pjesë në kongresin e Partisë Socialdemokrate Gjermane (SPD), i cili po mbahet në Berlin, Republika Federale e Gjermanisë, nën moton “Ndryshimi fillon me ne”, njoftoi këtë mëngjes LSDM, përcjell Zhurnal.mk.
Në kuadër të kongresit, kryetari Filipçe do të ketë takim me zëvendëskancelarin aktual të Gjermanisë dhe ministër federal për financa, Lars Klingbeil, i cili njëkohësisht është edhe bashkëkryetar i SPD-së. Janë paraparë edhe takime bilaterale me politikanë dhe funksionarë evropianë që janë të pranishëm në kongres.
Në kongresin në të cilin, ndër të tjera, do të zgjidhet edhe udhëheqësia e re e SPD-së, do të marrin pjesë politikanë dhe funksionarë të shquar gjermanë aktualë, si dhe kryetarë të partive socialdemokrate nga Evropa.
Ftesën për pjesëmarrjen e Filipçes në këtë kongres, LSDM e konsideron si shprehje e angazhimit të përbashkët për një të ardhme evropiane, drejtësi sociale dhe bashkëpunim rajonal, të bazuar në vlerat e socialdemokracisë – barazi, solidaritet dhe demokraci.
