Shkup, 14 korrik – Në mbledhjen e ardhshme të aksionarëve të kombinatit bujqësor KB Pelagonia Sh.A. Manastir, e cila do të mbahet më 11 gusht, është propozuar shkarkimi i Salaudin Arifit nga pozita e anëtarit të Bordit Drejtues. Në vend të tij, si anëtar i ri joekzekutiv dhe i pavarur, pritet të emërohet Jove Kekenovski, profesor universitar dhe ish-politikan, përcjell INA.
Edhe pse nuk figuron si aksionar i drejtpërdrejtë në dokumentet zyrtare të kompanisë, Salaudin Arifi ka pronësi të konsiderueshme indirekte në kombinatin bujqësor Pelagonia. Ai është themelues dhe pronar i kompanisë “Nova Agro Invest” DOOEL Shkup, e cila zotëron rreth 9.86% të aksioneve në kombinat. Kjo e bën Arifin një nga përfaqësuesit me ndikim në strukturën pronësore të ndërmarrjes.
Përveç kësaj, Arifi është pronar i kompanisë AS Senjak me seli në Kërçovë, përmes së cilës ka marrë pjesë në transaksione të rëndësishme në sektorin agro-industrial, përfshirë blerjen e aksioneve në kompani si Zhito Pollog, ku kishte rreth 5.5% deri në vitin 2023.
KB”Pelagonia” Sh.A. Manastir është ndër ndërmarrjet më të mëdha bujqësore në Maqedoninë e Veriut, me investime në prodhimin e drithërave, blegtorinë, qumështin, mishin dhe energjinë nga biogazi. Kompania për vitin 2024 ka shënuar fitim neto prej rreth 301,000 euro, ndërsa në tremujorin e parë të vitit 2025 fitimi neto u rrit në afro 286,000 euro, duke shënuar rritje prej 97% krahasuar me periudhën e njëjtë të vitit të kaluar.
Shkarkimi i Arifit nga bordi vjen në kohë të ndjeshme për kompaninë, duke sinjalizuar ndryshime në drejtimin strategjik të një prej ndërmarrjeve kryesore bujqësore të vendit. Me këtë ndryshim, pritet të forcohet roli i mbikëqyrjes së pavarur në strukturën drejtuese të KB “Pelagonia”. Me heqjen e Arifit, bordi i këtij kombinati si shoqëri aksionare private do të përbëhet nga Jove Kekenovski, si anëtar i ri joekzekutiv dhe i pavarur, si dhe nga aktualët: Cvetan Pandeleski, Vesna Beleshovska Bunteska, Aleksandar Georgiev dhe Aneta Gjorgiev.
Kjo është struktura e përditësuar e aksionarëve me pjesëmarrje mbi 5% në kapitalin e KB “Pelagonia” Sh.A. Manastir:
Orka Holding AD – pronë e Orce Kamçev – zotëron 22.69% të aksioneve, pas një transaksioni me “Sofija Gradba” që u zëvendësua si aksionar me pjesëmarrje mbi 5%
Zlatko Piruze – mbart rreth 17.6% të aksioneve
Cvetan Pandeleski – aksionar me 14.6% të kapitalit
Nova Agro Invest DOOEL – mbajtes i 9.86% të aksioneve
Dejan Pandeleski – zotëron 5.2% të aksioneve
Snezana Georgieva – mbart rreth 5.19% të kapitalit
Të tjera pjesë të aksioneve (rreth 25–34%) janë të shpërndara mes aksionarëve të tjerë të vegjël, përfshirë shitësit e mundshëm të paketeve të aksioneve në bursa.
