Shkup, 14 korrik – Drejtoria e doganave gjatë vitit të kaluar tregoi qartë se mund të jetë në shërbim të shtetit, qytetarëve dhe ekonomisë. Ky është edhe qëllimi bazë i çdo institucioni shtetëror – të shërbejë me efikasitet, llogaridhënie dhe transparencë, tha sot ministrja e Financave, Gordana Dimitrieska-Koçoska.
Në fjalimin e saj në ngjarjen e titulluar “Një vit me rezultate” ku Dogana raportoi për punën e saj gjatë vitit të kaluar, Dimitrieska-Koçoska theksoi se shifrat janë impresionuese dhe se janë dëshmi e qartë e punës së përkushtuar, profesionale dhe transparente të këtij institucioni.
“Ato janë rezultat i punës së palodhur, vizionit dhe bashkëpunimit dhe paraqesin një tjetër konfirmim se kur institucionet udhëhiqen nga njerëz me integritet dhe përgjegjësi, suksesi është i pashmangshëm. Do të doja të theksoja veçanërisht rritjen e ndjeshme të detyrimeve të importit të cilat tregojnë një normë të rritjes dyshifrore gjatë gjithë vitit, trend që filloi vitin e kaluar me ardhjen e udhëheqësisë së re. Të dhënat e fundit tregojnë rritje deri në 16% krahasuar me të njëjtën periudhë të vitit të kaluar – dhe kjo nuk është e rastësishme. Ky është rezultat i zbatimit konzistent të ligjeve dhe proceseve të avancuara”, theksoi ministrja.
Ky trend pozitiv, shtoi ajo është dëshmi se kur ka një sistem që funksionon dhe ku njerëzit e kuptojnë rolin dhe përgjegjësinë e tyre, rezultatet nuk mungojnë.
“Pres dhe besoj se kjo dinamikë do të vazhdojë edhe më tej dhe se Drejtoria e doganës do të vazhdojë të jetë një shtyllë stabiliteti dhe mbështetje për disiplinën fiskale në vend”, theksoi ministri.
Para saj, drejtori i Drejtorisë së doganave, Boban Nikollovski prezantoi rezultatet e punës së realizuar, ndërsa më pas fjalim mbajti edhe kryeministri Hristijan Mickoski.
