Shkup, 1 shtator – Zilja e shkollës do të tingëllojë sot për të shënuar fillimin e vitit të ri shkollor 2025/2026 për 245 mijë nxënës, përkatësisht 177.800 nxënës të shkollave fillore dhe 67.200 nxënës të shkollave të mesme. Në ministrinë e Arsimit kanë arritur të dhëna për 17.250 filloristë dhe 17.230 nxënës në vitin e parë të arsimit të mesëm, por të dhënat nuk janë përfundimtare, duke pasur parasysh se shkollat ende po dorëzojnë shifra.
Mësim do të ketë deri më 10 qershor, ndërsa përjashtim do të jenë maturantët, për të cilët orët e rregullta do të zgjasin deri më 15 maj. Janë siguruar libra për të gjithë nxënësit, ndërsa për herë të parë pas shtatë viteve do të ketë edhe libra për gjuhë të huaja. Inteligjenca artificiale po hyn në mësimdhënie, ndërsa asistentë arsimorë mund të kenë edhe nxënësit e shkollave të mesme.
Ministrja e Arsimit dhe Shkencës, Vesna Janevska dje në konferencë për shtyp informoi se në më shumë shkolla kushtet për mësim janë përmirësuar, ndërsa inkluzioni është ngritur me angazhimin e numrit të rritur të asistentëve arsimorë në shkollat fillore dhe për herë të parë në të mesmet.
“Sivjet viti i dytë shkollor me radhë filloi me libra për të gjithë nxënësit. Libra të reja plotësisht ka për klasën e shtatë në arsimin fillor dhe për vitin e parë në gjimnazet, për shkak të zbatimit të programeve të reja arsimore dhe paralajmëroj se ky proces i ripërtëritjes së përmbajtjeve arsimore do të ketë në vazhdimësi. Për herë të parë pas shtatë viteve, nxënësit do të kenë edhe libra për gjuhë të huaja – anglisht, frengjisht, gjermanisht dhe italisht”, tha Janevska, duke shtuar se të gjitha janë botuar dhe mbi 90 për qind të tirazhit tanimë u dorëzua.
Duke filluar nga ky vit shkollor, fillon zbatimi i një ditari të ri elektronik, i cili ka performancë dukshëm më të mirë se ai i mëparshmi, dhe mësuesit do të jenë në gjendje të hyjnë dhe të plotësojnë të dhënat në çdo kohë.
Inteligjenca artificiale po hyn në mësimdhënie, për të cilën është përgatitur një manual gjithëpërfshirës për edukimin si të mësuesve ashtu edhe të nxënësve, me udhëzime të qarta për përdorimin etik dhe efikas të mjeteve të reja teknologjike për qëllime arsimore.
