Shkup, 1 shtator – Të akuzuarit në rastin “Geriatria” sot para Gjykatës Themelore Penale në Shkup janë deklaruar se nuk ndjehen fajtorë për akuzat që u m’vishen. Muhsin Arifi, drejtor i Spitalit të specializuar për mjekësi geriatrike dhe paliative, po ndiqet penalisht për ryshfet, ndërsa Blerim Amiti akuzohet për marrje të shpërblimit për ndikim të kundërligjshëm.
Sipas aktakuzës, Arifi ka kërkuar një përfitim financiar prej 20.000 euro për të mundësuar shtrimin në spital të një paciente në gjendje të rëndë shëndetësore. Amiti i cili më parë e ka njohur dëshmitarin është ofruar të ndërmjetësojë dhe ka marrë shumën e parave, gjatë së cilës është kapur në vendin e ngjarjes nga policia.
Prokurorja Iskra Haxhi Vasileva, në fjalën e saj hyrëse para gjykatës, theksoi se rasti është një shembull i korrupsionit të thellë në shoqëri.
“Përmasat dhe intensiteti i korrupsionit janë aq të thella sa na kujtojnë se ato ndikojnë në çdo sferë të jetës sonë”, tha ajo duke shtuar se bëhet fjalë për kërkesë të drejtpërdrejtë dhe të ashpër për ryshfet nga drejtori – një shumë që është objekt negociatash dhe në fund u pranua si minimal për të kryer një veprim zyrtar që përndryshe duhej të kryhej pa kompensim.
Haxhi Vasileva ka thënë se të akuzuarit kanë vepruar për arsye fitimprurëse, me qëllim pasurimin personal, duke përfituar nga cenueshmëria e pacientes dhe nevojës së saj për kujdes mjekësor urgjent. Ajo theksoi se dëshmitarja e cila është ofruese e mbështetjes gjatë gjithë jetës së pacientes e ka denoncuar rastin dhe provat që do t’i paraqiten gjykatës dokumentojnë qartë veprimet korruptive përmes disa ngjarjeve të njëpasnjëshme.
Mbrojtja e të akuzuarve ka paralajmëruar se gjatë procedurës penale do të prezantojë prova në formën e një statuti, procedurave dhe dispozitave ligjore që dalin nga institucioni i përfaqësuar nga i akuzuari Muhsin Arifi. Përmes tyre, siç thonë ata, do të hapen disa çështje ligjore me qëllim që të vërtetohet se Arifi, si dhe Amiti nuk mundën, ose nuk kanë pasur ndërmend të kryenin ndonjë vepër penale.
“Provat që do të paraqiten dhe do të prezantohen në vijim të procedurës, jemi të bindur se do të tregojnë për një keqkuptim që ka ndodhur në të ashtuquajturën ‘ngjarje juridiko-penale’”, njofton mbrojtja.
Procesi gjyqësor drejtohet nga gjyqtarët Lenka Davitkova dhe Ilija Tërpkov.
Gjykimi vazhdon më 16 shtator në orën 13.
