Programi i Kujdesit Social në buxhetin e vitit 2026 është 27.7 miliardë lekë.
Ministrja e Shëndetësisë dhe Mirëqenies Sociale, Evis Sala solli në vëmendje sot se në buxhetin 2026 sektori i kujdesit dhe mbrojtjes sociale zë 33.6% të buxhetit total të Ministrisë së Shëndetësisë dhe Mbrojtjes Sociale, ose 3.1% të buxhetit të shtetit dhe rreth 1% të PBB-së.
Mbrojtja sociale garantohet përmes tre programeve kryesore: Skema e Ndihmës Ekonomike, Skema e Aftësisë së Kufizuar dhe Shërbimet e Kujdesit Social.
“Këto programe mbështesin familjet në nevojë, personat me aftësi të kufizuara, fëmijët, të moshuarit dhe viktimat e dhunës dhe trafikimit”, theksoi Sala.
“Buxheti i Programit të Kujdesit Social për vitin 2026 është 27.7 miliardë lekë, duke përfshirë disa investime: 2.3 miliardë lekë për Bonusin e Bebes; 850 milionë lekë për nënat me tre ose më shumë fëmijë — me 8,300 përfitues; 15.3 miliardë lekë për rreth 94,000 persona me aftësi të kufizuara dhe kujdestarët e tyre; 1.4 miliardë lekë për institucionet rezidenciale me 1,200 përfitues dhe 400 milionë lekë për Fondin Social, një rritje prej 22.2%, duke mbështetur 95 shërbime komunitare në 61 bashkitë e vendit”, tha Sala.
Sipas saj, buxheti 2026 për shëndetësinë dhe mirëqenien sociale nuk është thjesht një grup shifrash.
“Ky buxhet është një prioritet për të investuar te njerëzit, te dinjiteti, te mundësitë e barabarta dhe e ardhmja jonë evropiane”, tha Sala.
