Qafë Thanë, 24 shkurt – Prej katër ditësh, rreth 50 kamionë të tonazheve të rënda janë bllokuar në Qafë Thanë, pas problemeve në zonën e Urës së Arrave.
Shumica e mjeteve vijnë nga Turqia dhe Maqedonia, ndërsa shoferët po qëndrojnë në kufi, duke fjetur në kabina dhe pa akses në kushte bazë.
Një shofer turk u shpreh për Euronews Albania:
“Prej tre ditësh jemi këtu. Jemi në gjendje shumë të vështirë. Flemë në kamion, nuk kemi as vend ku të hamë diçka, as restorant pranë. Çdo gjë është shpenzim. Makinat tona po shkatërrohen sa herë kalojmë këtu. Si qytetar turk, më vjen shumë keq për shqiptarët që jetojnë në këtë gjendje. Shqiptarët janë vëllezërit tanë. Duam që edhe këtu të ndërtohen rrugë moderne.”
Në këtë pikë kufitare qarkullojnë mbi 200 mjete të rënda në ditë. Deri në hapjen e rrugës, shoferët thonë se nuk kanë alternativë tjetër veçse të presin.
