Tteovë, 7 maj Zhurnal.mk – Pas raportimeve në disa media dhe rrjete sociale se një mjek është sulmuar në Spitalin Klinik të Tetovës, nga ky institucion kanë reaguar duke mohuar se ngjarja ka ndodhur brenda ambienteve të spitalit apo në lidhje me detyrën zyrtare të personelit mjekësor.
Më herët, u raportua se një mjek i Spitalit Klinik të Tetovës ishte rrahur brutalisht, ndërsa sipas informacioneve të publikuara, rrethanat e rastit mbeteshin ende të paqarta dhe nuk kishte detaje zyrtare për motivet apo mënyrën e ndodhjes së incidentit.
Nga Spitali Klinik i Tetovës sqarojnë se bëhet fjalë për një çështje private, e cila nuk ka ndodhur brenda institucionit dhe as gjatë orarit të punës.
“Të nderuar qytetarë, të nderuar pacientë, ju informojmë se lajmi që po qarkullon në disa portale dhe rrjete sociale se një mjek është sulmuar në Spitalin Klinik të Tetovës, nuk është i vërtetë. Ngjarja nuk ka ndodhur brenda spitalit dhe nuk lidhet me procesin e punës apo detyrën zyrtare të personelit mjekësor”, thuhet në reagimin e spitalit.
Nga institucioni gjithashtu apeluan deri te mediat dhe qytetarët që informacionet të publikohen të verifikuara dhe me kujdes, në interes të informimit të drejtë të opinionit publik.
