Beograd, 15 maj, Zhurnal.mk – Tensionet në Serbi midis studentëve protestues dhe mbështetësve të tyre nga njëra anë, dhe mbështetësve të Kryetarit autoritar Aleksandar Vuçiç u shënuan me një incident tjetër dje në kryeqytetin Beograd, raporton dtt-net.com, përcjellë Zhurnal.mk.
Një mbështetës i Vuçiçit dhe partisë së tij në pushtet, pas një grindjeje me protestuesit para fakultetit të filozofisë, u përplas me makinën e tij mbi protestuesit, të cilët po bllokonin rrugën, duke lënduar një mbështetës të moshuar të studentëve ndërsa ngiste prapa veturën me qëllim.
Personi i moshuar i lënduar u dërgua në spital për trajtim ndërsa drejtuesi i veturës pasi që tentoi të ikë nga vendi i ngjarjes, u zu dhe u dërgua në paraburgim.
Dhunë e ngjashme ndaj studentëve dhe mbështetësve të tyre është parë prej muajsh tashmë.
Incidenti shkaktoi zemërim midis studentëve, të cilët më pas marshuan drejt ndërtesës së transmetuesit publik, RTS, duke protestuar kundër raportimit të njëanshëm dhe jo-korekt për incidentin.
Mijëra njerëz u mblodhën para televizionit RTS dhe qëndruan atje deri në orën 20:00.
Në solidaritet me protestuesit, një tubim i ngjashëm u zhvillua në Nish, ku mijëra njerëz dolën në rrugët e qytetit. Studentët dhe mbështetësit e tyre u mblodhën sot në kryeqytet për të bërë homazhe për 16 viktimat, përfshirë një student, të cilët humbën jetën në nëntor 2024 kur u shemb një tendë stacioni treni.
Protesta të ngjashme të studentëve po zhvillohen në të gjithë vendin që prej asaj kohe pothuajse çdo ditë.
Studentët dhe opozita kërkojnë llogaridhënie nga Vuçiçi dhe qeveria e tij, pasi besojnë se e vetmja mënyrë për llogaridhënie të plotë për aksidentin tragjik është ndryshimi i regjimit, pasi Vuçiç vazhdon të mbrojë bashkëpunëtorët e tij nga gjyqet.
Studentët po planifikojnë që të marrin pjesë në zgjedhjet e parakohshme parlamentare përmes Listës së Studentëve, e cila do të përbëhet nga profesorë dhe personalitete të palidhura me politikën deri më tash.
Rektori i Universitetit të Beogradit, Vladan Djokic, deri më tash është më i mbështeturi nga studentët për të udhëhequr Listën e Studentëve kundër Vuçiçit, i cili nuk mund të kandidojë për një mandat të tretë kryetari vendit dhe po planifikon që të japë dorëheqjen për të kandiduar për postin e kryeministrit.
Një tubim i madh në kryeqytetin Beograd do të organizohet nga studentët më 23 maj, duke rritur presionin mbi Vuçiçin për të caktuar një datë për zgjedhje të parakohshme.
Më 5 maj, Vuçiç tha se do të shpallë ditën e zgjedhjeve “brenda dhjetë ditësh”, që është më së voni këtë javë. / Zhurnal.mk
