Shkup, 14 qershor Zhurnal.mk – Kryetari i VMRO-DPMNE-së dhe njëherazi kryeministër i Maqedonisë së Veriut, Hristijan Mickoski, njoftoi se më 17 qershor në stadiumin e Strumicës do të shënohet përvjetori i partisë, ndërsa pas këtij aktiviteti do të fillojnë bisedimet me partnerët e koalicionit qeveritar për rindërtimin e Qeverisë.
“Javën e ardhshme, pas festimit të ditëlindjes së partisë më 17 qershor në Strumicë, me fillim në orën 20:00, do të nisim bisedimet me partnerët e koalicionit qeveritar lidhur me rindërtimin e Qeverisë”, deklaroi Mickoski.
Duke komentuar pretendimet e opozitës se Qeveria po përgatit zgjedhje të parakohshme pasi ka shpenzuar fondet shtetërore, Mickoski tha se këto akuza nuk kanë logjikë dhe se qëndrimi i VMRO-DPMNE-së është që të mos ketë zgjedhje të parakohshme.
Ai theksoi se qytetarët i kanë dhënë mandat katërvjeçar qeverisë dhe se synimi është mbajtja e zgjedhjeve të rregullta parlamentare në pranverën e vitit 2028. Megjithatë, sipas tij, nëse partia përballet me sfida politike dhe detyrohet të hyjë në zgjedhje të parakohshme, ajo do të jetë e përgatitur dhe do të dalë fituese.
“Nuk kemi ndërmend të shkaktojmë zgjedhje të parakohshme. Qëllimi ynë janë zgjedhjet e rregullta, por nëse sfidohemi, do të shkojmë në zgjedhje dhe do të fitojmë”, tha Mickoski.
